10 dzīsmis, kurys dabuojušs “Boņuku”

10 dzīsmis, kurys dabuojušs “Boņuku”

Rokstu sagataveja: portals lakuga.lv

Itūgod jau 11. reizi padūs Latgalīšu kulturys goda bolvu “Boņuks”. Portals lakuga.lv pīduovoj 10 dzīšmu izlasi, kurys sovulaik dabuojušs Boņukus.

Bez PVN “Screen”

Grupys “Bez PVN” dzīsme “Screen” sajēme divejis Latgalīšu kulturys goda bolvys “Boņuks 2008” statuetis – nominacejā “Lobuokuo dzīsme” i “Lobuokais muzykys video”. Kai nazkod sacejušs grupys dalinīki, dzīsme ir par jim pošim.

“Kur gaismeņa” Oranžuo kora izpiļdejumā

Pyrmū popularitatis vilni dzīsme “Kur gaismeņa” pīdzeivuoja pasasokūt Gunta Rasima daleibai televizejis šovā “Talantu Fabrikas Muzikālais teātris”. Dažus godus vāluok dzīsmi izpiļdeja Atis Auzāns i Daugovpiļs Oranžais kors, tei beja vysspālātuokuo latgalīšu dzīsme radejā 2009. i 2010. godā , par tū sajēme Boņukus nominacejā “Radejis hits”.

Sovvaļnīks “Vosoruošonai”

Dzīsmis “Vosoruošonai” vuordu autore ir Līga Rundāne. Pyrmū reizi dzīsme izskanēje Sovvaļnīka i grupys “Bez PVN” izpiļdejumā 2006. godā, kai veļtejums latgalīšu volūdys entuziastim. Dažys godus vāluok dzīsmei radeja jaunu verseju i izjēme video. Tū 2010. gods Latgalīšu kulturys goda bolvys “Boņuks” padūšonys ceremonejā apbolvuoja kai lobuokū muzykys video.

Borowa MC “Vysskaistuokajai meitinei”

Grupys “Borowa Mc” izpiļdeituo dzīsme “Vysskaistuokajai meitinei” ar tik popularuos latgalīšu dzīsmis motivu klive par absolutu Latvejis muzykys hitu, uzvarūt aptaujā “Muzikālā Banka” i dabojūt nagaideiti lobus rezultatus ari cytūs topūs i bolvuos, dzīsme ari sajāmuse “Boņuks 2011” kai radejis hits.

Migla “Vīna jauna meitiņa”

Par 2012. gods lobuokū šlagera styla dzīsmi atzyna grupys “Migla” izpiļdeitū dzīsmi “Vīna jauna meitiņa”. Dzīsmis vuordi asūt atrosti kaidā senejā babys tautys dzīšmi kladē, nu muzykys skonūs tūs īgierbe vīnu nu kuodreizejūs grupys dalinīku, juos mozdāls, Lauris Kokorišs. Grupa ar itū dzīsmi pīsadalejuse ari “Latvijas Šlāgeraptaujā”.

Aldis Kise “Strūga”

Komponista i muzykys pedagoda Alda Kises dzīsme “Strūga” tyka īraksteita, kai veļtejums juo pyrmajam muzykys školuotuojam Ontonam Matvejānam. 2013. godā tei beja spālātuokuo dzīsme visaiduos radejid stacejuos, partū sajēme Boņuku nominacejā “Radejis hits”.

Komponista Riharda Dubrys “Tu skaistō Dīva dōrza rūze”

Skaņdorba “Tu skaistō Dīva dōrza rūze” autors ir komponists Rihards Dubra. Juo dorbu pamatā ir gareiga satura muzyka ar Bībelis tekstim. Skaņdorbs izskaniejs muzykalajā izvadumā “Francis”, kas veļteits politiķa i goreidznīka Fraņča Trasuna pīmiņai. Skaņdorbs atzeits par 2014. gods lobuokū snāgumu akademiskajā muzykā.

Tautumeitas “Aņņeite”

Latgalīšu kulturys goda bolvu “Boņuks 2015” nominacejā “Lobuokais muzykys video” sajēme grupys “Tautumeitas” dzīsmis “Aņņeite” vidoklips. Dzīsme pīraksteita folklorys ekspedicejā Aulejā.

Projekts “Jezups i Muosys” ft. Guntix ft. Jezups Martinovs “Sirds. Sirds. Sidrs.”

Projekts “Jezups i Muosys” rodīs kai protests pastuovūšajai muzykys īkuortai. 2016. godā apvīneiba publicēja sovu pyrmū i pagaidom vīneigū albumu “LAI SLAVA JAM”, kas apbolvuots nominacejā “Lobuokais snāgums alternativajā muzykā”. Dzīsmis “Sirds. Sirds. Sidrs.” video “Boņuka” žureja atzyna par lobuokū latgalīšu muzykys video 2016. godā.

Latgalīšu reps “Skots pa lūgu”

Eisā laikā populara kliva apvīneiba “Latgalīšu Resps” nu Ludzys. Tū pīruoda ari fakts, ka par panuokumim 2017. godā apvīneiba “Latgalīšu Reps” īgiva treis Boņukus – “Lobuokais snāgums alternativajā muzykā”, “Goda debeja muzykā” i “Lobuokais video” par dzīsmis “Skots palūgu” videoklipu.

Print Friendly, PDF & Email

Nūtikšonu kalendars