Rokstu sagataveja: portals lakuga.lv

Publicāts režisora Vīstura Kairiša jaunuokuos kinys “Piļsāta pi upis” prīškaceklis. Kina izjimta latgalīšu volūdā, skateituoju viertiejumam tū nūdūs 2020. godā.

Kinys žanrs ir tragikomedeja, kurā jaunu cylvāku attīceibu vīglums i mīlesteiba sasavej ar 20.g.s. 30.­–40.godu viesturiskajim nūtykumim. Producents Guntis Trekteris uzsver, ka kinā byus daudz vierīneigu inscinejumu, tuos stils byus episks, deļtam ka juoatainoj daudzi Latvejis viesturis nūtykumi: padūmu i nacistu okupacejis, Ūtrais pasauļa kars, deportacejis i Holokausts. Kina tūp piec Gunara Janovska romana motivim.

Golvonū varūni Ansi kinā atveidoj Dāvis Suharevskis nu Gaigolovys, juo partneri ir latvīšu aktiri Agnese Cīrule i Gundars Āboliņš, ari legendarais lītuvīšu aktirs Jozs Budraitis. Anša lelū mīlesteibu – ebreju meitini Zislu atveidoj čehu aktrise Brigita Cmuntova.

Portala lakuga.lv sarunu ar akteri Dāvi Suharevski puorskaitoma ite.