Stipeņdejis vareiba Latgolys jaunīšim

Stipeņdejis vareiba Latgolys jaunīšim

Rokstu sagataveja: portals lakuga.lv

Latvejis Universitatis (LU) fonds kas gods atbolsta vaira kai 100 LU studentus, tymā skaitā perspektivuokūs vydsškolu beidziejus, kuri suoc bakalaura studejis. Stipeņdeja “Ceļamaize” paradzāta ceņteigim, vuiceibuos spiejeigim i sabīdryskajā dzeivē aktivim 1. kursa studentim, lai veicynuotu izaugsmi i izcileibu. Itūgod pyrmū reizi div stipeņdejis byus paradzātys taišni vydsškolys beidziejim nu Latgolys, informej LU fonda sabīdryskūs attīceibu konsultaņte Brigita Zutere.

Suocūt ar 2019./2020. akademiskū godu, turpmuok tiks daškiertys papildu div eipašys stipeņdejis LU pamatstudeju 1. kursa studentim, kuru izceļsme meklejama Latgolā. Konkursā varēs pīsadaleit pyrmkursnīki, kuri poši ci jūs vacuoki, vacvacuoki ir dzymuši Latgolys pusē. Stipeņdeja ir nūzeimeigs finansials atbolsts vuiceibu procesā, jei veicynoj izaugsmi i izcileibu. Atbolsta pamataizdavums ir dūt īspieju i radeit lobvieleigu vidi, lai studenti varātu pylnvierteiguok nūsadūt izalaseituos studeju programys dziļuokai apgivei i dabuot storptautyski pīzeitu augstuokū izgleiteibu. Vēļ 1. kursa studentiem ir īspieja dasasaceit M. M. V. Petkevičys pīminis stipeņdejai, jū prioritari pīškir pyrmkursnīkim, kurim tryukst materialuo nūdrūsynuojuma. Dasasaceišona obejom stipeņdejom nūtiks rudiņa semestra suokumā – septembrī.

Stipeņdejis mecenats ir Amerikys latvīts Pīters A. Ragaušs ar dzymtys saknem Latgolā – Latvejis gūda konsuls Teksasā, ASV, kai ari vīns nu jaunuokūs LU fonda partnerorganizacejis “Friends of the University of Latvia” vaļdis lūcekļu P. A. Ragauša apjiemeiba i spareiba Latvejis augstuokuos izgleiteibys, biznesa attīceibu i kulturys veicynuošonā ir patīsi apbreinojams. Jis reikoj latvīšu svātku saītus, latvīšu filmu vokorus i cytus kulturys pasuokumus vītejai Hjūstonys latvīšu kūpīnai. P. A. Ragaušs ir devs boguoteigu īguļdejumu latvīšu, eipaši latgalīšu kulturys saglobuošonā i populariziešonā.Par gūdu Naatkareibys dīnai 2018. godā leidzfinansēja Niagarys iudiņakrytuma izgaismuošonu Latvejis karūga kruosuos. Mecenats apsazynoj, cik tuoli jauni, energiski i talanteigi cylvāki var tikt, ka jī sajam papyldu atbolstu. Pīters A. Ragaušs pīzeist, ka zīduojums LU var radeit nūzeimeigu ītekmi iz kaida dzeivi.“Ka lobuokī studenti – jaunīši ar vysaugstuokajom sekmem i lobuokū snāgumu – ir tī, kas daboj stipeņdejis, tod, atbolstūt tuos universitatis i fondus, kas tuoļuok pīduovoj ituos stipeņdejis, tu atbolsti studentus, kuri vystycamuok ar laiku tiks vadūšūs omotūs. Partū tu vari byut gondreiž puorlīcynuots, ka tovs īguļdejums ir daudzsūlūšuokūs studentu atbolstam i perspektivuokūs vaļsts nuokūtnis lideru sekmiešonai,” pīzeist Ragaušs.

Dasasokūt stipeņdejai, septembrī centralizātuos dasasaceišonys laikā byus juoīsnādz:

  • elektroniska veidlopa www.fonds.lv;
  • div rekomendacejis viestulis nu školuotuoju ci uorpusškolys nūdarbeibu vadeituoju;
  • CV (EUROPASS formā);
  • eseja breivā formā par mecenatu, kuram grybātu leidzynuotīs;
  • cyti dokumenti vērtīs pi stipeņdejis dasacejuma.

Kab dabuotu atbolstu, videjai svārtai atzeimei juobyun vysmoz 7,5 ballem. Stipeņdeju apmārs ir 2 200 eiro akademiskajā godā – stipeņdejis teik pīškiertys iz vīnu akademiskū godu, tys ir, 10 mienešim, sevkuru mienesi izmoksojūt attīceigu summu. Vīnlaiceigi var sajimt vīnu mecenata stipeņdeju.

Vaira informacejis:

fonds@fonds.lv ci 20127040.

Kalenders

Apr
25
Pīk
09:00 “Satiec savu meistaru 2025” @ Latgola
“Satiec savu meistaru 2025” @ Latgola
Apr 25 @ 09:00 – Apr 27 @ 16:00
Jau 17. reizi aprelī vysā Latvejā nūteik kasgadejais pasuokums “Satiec savu meistaru!”, kura laikā sevkurs interesents ir aicynuots dūtīs pi meistaru īpazeit i paraudzeit vysaidys tradicionalūs omotu prasmis.   Vaira par nūtikšonom Latgolā var izzynuot[...]
16:00 Rotko muzeja 12. dzimšonys dīna @ Rotko muzejs
Rotko muzeja 12. dzimšonys dīna @ Rotko muzejs
Apr 25 @ 16:00 – 18:00
Sovu divpadsmytū dzimšonys dīnu Rotko muzejs svieteis 25. aprelī 16.00 stuņdēs ar pavasara sezonys izstuožu katalogu prezentaceju i puorstuovātūs muokslinīku sumynuošonu. Kataloga attaiseišonys svātkus pīdzeivuos Rituma Ivanova personalizstuode “Templis”, siguldītis Ivetys Šmitys soloprojekts “Mežam ir[...]