Roksta autors: lakuga.lv

27. martā, Starptautyskajā teatra dīnā, 18.00 stuņdēs Rēzeknis Tautys teatris Rēzeknis Muokslys nomā (18. novembra īlā 26) pīduovoj pasavērt, kai suocās izruode. Itūreiz skateituojim byus īspieja dzierdēt Annys Rancānis jaunuokuos lugys “Cherchez la Femme! Meklējiet sievieti!” lasejumu kūpā ar Rēzeknis Tautys teatri. Vokora turpynuojumā – sarunys par lugu i dzeivi. Īeja – breiva, dasasaceišona da 26. marta: 64622066 (Rēzeknis KN).

Vaira par itū nūtikšonu stuosta Rēzeknis Tautys teatra režisore Māra Zaļaiskalns: “Datums nav najaušs, mes gribējom īzeimēt Storptautyskū teatra dīnu, tei mums ir svātku dīna. Latvejā padūmu laikā tys beja cīš aktivs pasuokums ar guojīnim, pat trupu saceņseibom, jū atzeimuoja vysi profesionalī teatri, mums ari vysod bejuši sovi pasuokumi – leluoki voi mozuoki. Laiki ir puorsamejuši, bet itei dīna mums taipat ir eipaša.

Pyrmū reizi tiks laseits niule pīraksteits dorbs – Annys Rancānis “Meklējiet sievieti!”. Lasejums nūtiks naformalā, eksperimentalā veidā – Rēzeknis Tautys teatra akteri laseis pa lūmom, bet jai nasagataveiti. Teatra pamatlykumūs izruodi veidoj svātuo treisvīneiba – dramaturgs, skateituojs, akters. Annai tys ari ir nūtykums. Lai nūteik ituos sarunys, varbyut rassīs vēļ jauni Latgolys dramaturgi voi kluseibā rokstūšī pīduovuos mums sovus dorbus. Bet mes gribējom ari apzynuot, kaidi skateituoji atīs, partū mes prasejom dasasaceit. Gribīs atmūdynuot Rēzeknis skateituoju. Lai naīt vīnkuorši iz gotovu izruodi – izklaidejit mani, bet lai jis pats palīk par leidzautoru. Ka ir juopazvona, tei ir ari uzadrūsynuošona – pazvaneit i nūsaukt sovu vuordu. Tys varātu byut interesanti ari piec tam, kod luga tiks īstudāta iz skotivis, taišni pasavērt, kai nu ituo literaruo materiala veidojās i atsateista izruode. Varbyut tys varātu turpynuotīs ar atkluotim mieginuojumim.

Gribējuos reizē atdzeivynuot ari Rēzeknis Muokslys nomu. Te ir savuokts i izkuortuots vierteigs montuojums, žāļ, ka itamā breineigajā vītā nikas bīži nanūteik. Byutu labi, ka reizi mienesī te ari koč kas nūtyktu.”