Rokstu sagataveja: portals lakuga.lv

Vysā Latvejā nu 5. da 7. apreļa jau 11. reizi nūtiks akceja “Satiec savu meistaru!”. Sevkurs aicynuots apmeklēt meistardarbneicys, individualuos nūdarbeibys, atvārtuos darbneicys, paraugdemonstriejumus, lekcejis, prīšklasejumus, koncertus i daņčus.

Projekta “Satiec savu meistaru!” byuteiba ir viesteit sabīdreibai par namaterialuo kulturys montuojuma saglobuošonu i puormontuošonu, kai ari meistarim, jūs zynuošonom i prasmem. Iz dažaidom nūtikšonom aicynuos ari meistari nu 12 Latgolys nūvodim.

Baļtinovā byus vareiba īsavuiceit dzīduošonu ar pusbolsu, tautys muzykanta Andreja Rancāna poļkys i raudzeit atdarynuot māslu tolkys prīškautu. Bolvu nūvodā varēs vuiceitīs cept tortis i īt rūtaļuos ar tautys muzykantu Zinti Krakopu.

Cyblys nūvodā vuiceis zyrga apkaļšonu, sveču līšonu, bet eipašs nūtykums byus folklorys kūpys “Ilža” albuma “Ludzys igauņu dzīsmis” prezentaceja. Dagdys nūvoda muzejā “Ondrupinis lauku sāta” varēs taiseit zamlada kūka mokšoris, izkaļt plokonuos aprūcis pi Dāvja Ieviņa, taipat varēs apgiut ari kulinarū i dzīšmu montuojumu.

Daugovpiļs nūvodā vairuokūs pogostūs pi meistarim varēs apgiut tradicionalū muziciešonu, peit grūzus i izzynuot vaira par uorstnīceibys augu izmontuošonu uzturā. Kruoslovys pusis meistari vuiceis darynuot celainis i taiseit sviļpaunīkus.

Rēzeknis nūvodā varēs īsavuicēt peit zediņu sātmaļus, bet Vileks nūvoda “Zeļčūs” Annele Slišāne aicynoj sataiseit vilnys zirdzeņus. Vysu nūtikšonu sarokstu Latgolā i seikuoku informaceju var atrast “Satiec savu meistaru!” sātyslopā.

Drukavuot