Rokstu sagataveja: portals lakuga.lv

AIJIS ERINIS talants juos eisajā myužā vysspūdruok izapaude muzykā – soliste, dzīšmu autore. Mozuok zynoms ir Aijis sovpateigais literarais veikums – analitiskuo žurnalistika, esejis, dzeja. Gūdynojūt Aijis pīmiņu, juos tyvinīki i draugi organizej jaunūs talantu konkursu, lai tys izaugtu par tradicionalu kulturys nūtikšonu.

Aijis tāvs i konkursa organizators Andris Eriņš par konkursa ideju: “Aija poša nazkod saceja: “Kod es byušu nūguojuse nu skotivis, tod es vierzeišu i atbaļsteišu jaunūs, kai viņ variešu.” Ar itū konkursu ceņšūs realizēt juos īceri. Kaidi byus panuokumi ar daleibnīku skaitu i kvalitatem,  redzēsim.”

Taišni Aijis dzimšonys dīnā, 12. majā, 15.00 stuņdēs Rēzeknis nūvoda Gaigalovys kulturys nomā nūtiks konkursa nūslāguma pasuokums. Treis atseviškūs konkursūs tiks vārtāti jaunī vokalisti, dzīšmu autori i literati.

Vokalistu konkursa pīsadaleituoji izpiļdeis div dzīsmis – tautysdzīsmi i breivys izvēlis skaņdorbu a capella ci ar pavadejumu. Jūs žureja vērtēs treis vacuma grupuos: “Cuoleiši “ (4–8 godi), “Ceiruleiši” (9–13 godi); “Laksteigolys“ (14–19 godi). Dasacejumus vajag elektroniski atsyuteit da 2019. gods 24. apreļa iz e-postu andriserins@inbox.lv. Dasacejuma veidlopa atrūnama ite.

Dzīšmu autoru originaldzīšmu konkursā (9–19 godi) juopīsadola ar vīnu dzīsmi. Tū var izpiļdeit pats autors, cyts solists ci ansamblis. Dasacejumus vajag elektroniski atsyuteit da 2019. gods 24. apreļa iz e-postu andriserins@inbox.lv. Dasacejuma veidlopa atrūnama ite.

Literaruos jaunradis konkursa (9–19 godi) pīsadaleituoji roksta eseju (na mozuok kai 3600 rokstu zeimis aba 2 A4 formata lopys) par temu “Mana dzimtene – Latvija” ci ari sovu breivi izalaseitu temu. Organizatori paredz vareibu dorbus ari publicēt. Eseju juoatsyuta elektroniski da 2019. gods 1. maja iz e-postu dricanuauseklis@inbox.lv.

Plašuok par organizatoriskom lītom konkursa nūlykumā ite.

Drukavuot