Roksta autors: portals lakuga.lv

Latgolys entuziastu grupa “Biļdis” ir izdavuse Inetys Atpilis-Juganis dzejūļu gruomotu bārnim “Lobuo i nalobuo” ar meitys Agnetys Juganis ilustracejom. Skaiteituojim teik pīduovuota dzejiska kaituošonuos par faktu, ka mums ir div rūkys, i kas saīt, kod apleicejū pasauli sadola div pusēs – lobajā i kreisajā – piec taida pat priņcipa.

Vajag paturēt pruotā, ka bārnu gruomota vysod ir vareiba lelajam pīaugušajam drupeit pasaaugt sovā pruotā i palikt boguotuokam sovā sirdsgudreibā, partū ka nu skaiteišonys i biļdeišu vieršonuos kūpā ar mozū parosti saīt saruna taišni pošim par sevi i apleicejom lītom. Ituos gruomotys pādejā lopā ir pīduovuojums pīraksteit sovu dzejūli. Bet var jimt rūkā kruosys i pīzeimuot kluot ari biļdi. Varbyut na tik sarežgeiti – var vīnkuorši ar ūteņu pīpāduot. Golvonais ir kluotbyušona i izdzeivuošona.

Itei ir Inetys ūtruo dzejūļu gruomata bārnim, pyrmuo “Otkon giunu sapynus” izguoja 2015. godā  ari ar Agnetys ilustracejom. Rūka ir īsysta, i eipaši pastreipojama volūdys kvalitate: latgaliski vuordi (skuteleite, zababoni, kalaši), vuordu kaitys atskaņuos i salykumūs (aizmiersa naaizmierst), deminutivu darynuojumūs (kipareņš, karīseņš, knusureņš).

Pyrmuo īsavieršona itamā gruomotā byus 27. aprelī Latgolys dīnys pasuokumā Latvejis Nacionalajā bibliotekā – 13.00 stuņdēs 6. stuovā.

Ūtruo īsavieršona nūtiks radūšajā darbneicā Muzeju naktī Latgolys Kulturviesturis muzejā 18. majā nu 19.30 da 22.00.