Juoņa Klīdzieja 105 godu jubileju atzeimoj vysā Latvejā
Rokstu sagataveja: portals lakuga.lv
6. majā JUOŅAM KLĪDZIEJAM (1914–2000) palyktu 105. Juo literarais davums ir īspaideigs – ap 30 gruomotu, bet byutu bejs gona ar vīnu pošu romanu “Cilvēka bērns”. Reežisora Juoņa Streiča filmys tālā īdzeivynuotais Boņuks – puiškins ar skaidru emocionalū pasauli i naivim, a reizē dzilim dzeivis vaicuojumim – sajiusmynoj vysu paaudžu cylvākus na viņ Latvejā.
Emocionaluokais nu pasuokumu – 6. majā 17.00 stuņdēs muzykala vakariešona ar J. Streiču Latgolys viestnīceibā GORS “Zalta kristeņš”. J. Streičs i akteri Jānis Paukštello, Viktorija Streiča, Sarmīte Rubule, kai ari muzyks Ēriks Zeps i grupa “Rikši” kūpā ar skateituojim skaiteis i izdzīduos rakstnīka stuostu “Zalta kristeņš”. Vokors byus vakariešona kai kinorežisora bierneibā, kod zīmys vokorūs saguoja kaiminīnis, kab, darynojūt leidza pajimtūs rūkdorbus, varātu klauseitīs, kū Streiču Juoneits jom skaiteja prīškā. (Leluo zale 7,00 eiro.)
Daži J. Klīdziejam veļteiti pasuokumi školuos i bibliotekuos jau nūtykuši: 29. martā Vacpībolgys vydsškolys kasgadejā Laseišonys maratonā 1.–3. klasis audziekni itūgod skaitejuši fragmentu nu gruomotys “Cilvēka bērns”; 26. aprelī Bolvūs Bibliotekys Nakts 2019 pasuokumā “Muna dabasu puse” beja tikšonuos ar Boņuka lūmys atveiduotuoju Andri Rudzinski i radūšys dorbuošonuos J. Klīdzieja tālu pasaulī. Šudiņ, 3. majā, Rēzeknis nūvoda Sakstagola J. Klīdzieja pamatškolā nūteik rakstnīkam veļteits tematisks pasuokums “Spēlē ermonikas, Izidor…”.
Apkūpojūt škārsteiklā atrūnamū informaceju, rakstnīka gruomotu ci tematiskuos izstuodis ir ci byus apsaveramys bibliotekuos vysuos Latvejis moluos: Alyuksnis nūvoda Alsviķu, Strauteņu, Jaunlaicinis, Vaclaicinis, Zelteņu; Siguldys nūvoda; Īcavys nūvoda Edvarta Virzys Īcavys i Rūsmis; Salaspiļs Nūvoda; Raunys nūvoda Rūzis; Modūnis nūvoda Bārzaunis pamatškolys; Ventspils nūvoda Puzis i Gāliņciema; Leivuona nūvoda centralajā i Ezernīku pogosta bibliotēkā; Jākubpiļs Golvonuos bibliotekys i Uolainis bibliotekys Bārnu literaturys nūdaļā; Bauskys Centraluos bibliotekys Biznesa bibliotekā.
