Škilbānu sīvys pīduovoj naruotnuos dzīsmis īrokstā i pasuokumā

Škilbānu sīvys pīduovoj naruotnuos dzīsmis īrokstā i pasuokumā

Rokstu sagataveja: portals lakuga.lv

Svātdiņ, 5. majā, 19.00 stuņdēs Viļakys nūvoda Škilbānu pogosta kulturys centrā “Rekova” iz naruotnūs tautysdzīšmu pasuokumu “Pumpiņrasasā” prosa Škilbānu etnografiskuo ansambļa dzīduotuojis, kurys beidzūt sasajāmušys publiski izdzīduot i gūdā ceļt tuos dzīsmis, kas parosti jubilejuos, kaiduos ļusteiguos i savīseiguos saīšonys reizēs izskaņ tai vairuok iz pasuokuma beigom, informej Škilbānu etnografiskuo ansambļa vadeituoja Irina Husare.

Par naruotnūs tautysdzīšmu pasuokuma, kuram ansambļa daleibneicys davušys vuordu “Pumpiņrasasā”, eistynuošonu ideja škilbānītem bejuse jau seņ. “Napīmiņu, voi tys beja mieginuojums voi kaida dzimšonys dīna, bet siežam, pļuopojam, pa dzīsmei sadzīžam, tod Zenta “nūruove” “Dzer, buob, nabādoj” i saprotom, ka gribīs humoristiska tipa koncertu – pylnys kladis taidu dzīšmu i vajag ari juos izdzīduot,” par koncerta ideju stuosta ansambļa vadeituoja. Dzieduotuojis saprotušys, ka dzīšmu kladēs taidu naruotnūs, humora pylnūs dzīšmu ir daudz i laiks ari jom skanēt publiski. I ansambļa dzīduotuojis Zentys Pužulis, kura dīvamžāļ pārņ davusēss myužeibā, sovulaik dzīduotuo “Dzer, buob, nabādoj”, i Jadvigys Kovaļevskys braši izpiļdeituo “Oruojs ora ceļa molā” ir viņ īsuokums vysom nu vacuokūs dzīduotuoju montuotajom i pošu dzeivis laikā tautā saklauseitajom dzīsmem, kurys īrostai koncertūs skaņ moz. Dzīsmis svātdiņ gaidomajā koncertā skanēs latgaliski, i ansambļa daleibneicys ir prīceigys, ka beidzūt tuos dzīsmis, kas ilgi stuoviejušys kruojumūs, niu byušūt nūdereigys.

Naruotnūs dzīšmu festivaleņā “Pumpiņrasasā” Škilbānu etnografiskuo ansambļa dzīduotuojis prasejušys pīsadaleit ari folklorys kūpu “Rekavas dzintars”, Brīžucīma etnografiskū ansambli, Brīžucīma linejdeju grupu “Optimistes” i Brīžucīma muzykantis “AMMA”. Īeja koncertā bezmoksys, piec tuo gaidoma baļle ar Zinti Krakopu, īejis moksa baļlē 2 eiro.

Škilbānu etnografiskais ansamblis dybynuots 1981. gods novembrī, itūšaļt ansamblī dzīd ostonis dzīduotuojis. 2016. godā izguoja gruomateņa i albums “Škilbanu sīvas”, kas tyka veļteits ansambļa 35 godu pastuoviešonai, kai ari videoklips “Es apsieju lynu dryvu”, bet pārnejā godā XXVI Vyspuorejūs latvīšu Dzīšmu i XVI Deju svātku Latvīšu tautystārpu skatē ansamblis dabuoja trešū vītu Folklorys kūpu i etnografiskūs ansambļu kategorejā.

Škilbānu etnografiskuo ansambļa dzīsmi “Orojs ora ceļa molā” var nūsaklauseit ite.

Print Friendly, PDF & Email

Kalenders

Jul
16
Ūtr
17:00 Rezidejūšūs muokslinīku publisku... @ Rotko muzejs
Rezidejūšūs muokslinīku publisku... @ Rotko muzejs
Jul 16 @ 17:00 – 18:30
16. julī 17.00 stuņdēs Rotko muzejā sevkuram byus vareiba īpasazeit tyvuok ar ostonim storptautyskim muokslinīkim publiskajuos prezentacejuos, kurymuos jī īpazeistynuos ar sevi i sovu dailradi.   Nedelis garumā, nu 12. da 19. juļa Eiropys Savīneibys[...]