“Škiuņa džezs” Toma Lipska pīmiņai i jaunūs muzyku izaugsmei

“Škiuņa džezs” Toma Lipska pīmiņai i jaunūs muzyku izaugsmei

Rokstu sagataveja: portals lakuga.lv

Nu 28. da 31. augusta Rēzeknis nūvoda Lūznovys muižā nūtiks pyrmais Baļtejis džeza festivals “Škiuņa džezs” ar mierki ir veicynuot interesi par džeza muzyku, rūsynuot tūpūšūs i asūšūs džeza muzyku sadarbeibu, kai ari izdzeivuot džeza muzykys burveibu Latgolā, eipašajā Lūznovys muižys kompleksa vidē. Itūšaļt teik izsludynuota dasasaceišona festivala meistarklasem (da 15. juņa), informej Lūznovys muižys kulturys projektu vadeituoja Inga Žirgule.

Festivala meistarklasēs aicynuoti pīsadaleit džeza muzykys interesenti – muzykys školu i augstškolu studenti, tūpūšī muzyki i cyti džeza entuziasti. Festivalā nūtiks meistarklasis džeza muzykys profesionaļu vadeibā, vokorūs paradzātys festivala daleibnīku kūpeigys džema sesejis, kai ari džeza muzykys koncerti.

Ideja par džeza festivalu Lūznovys muižā suocēs ar puormeju sajiutu spuornuošonu – 2018. goda septembrī Juoņa Ivanova Rēzeknis Muzykys vydsškolā tyka izveiduota Džeza muzykys nūdaļa, kurys vadeibu pasajēme džeza muzyks, komponists Toms Lipskis. Jam, suocūt dorbu Latgolā, ari roduos dūma veiduot džeza festivalu Lūznovā, tai pasajamūt ari tūpūšuo festivala muokslinīcyskū vadeibu. 2018. gods vosorys nūslāgumā Lūznovys “Kulturys škiunī” div koncertprogramuos izskanēja džeza festivala īskaņu koncerts “Džezs. Priekšsajūta”, īzeimejūt festivala laiku i vītu. Dīvamžāļ rudinī Toms puoragri devēs myužeibā, bet, gūdynojūt juo īsuoktū dorbu i veļtejūt festivalu T. Lipska pīmiņai, nu 28. da 31. augusta Lūznovys muižā nūtiks pyrmais Baļtejis džeza festivals “Škiuņa džezs”, kura devize ir “Turpinājums!”. Turpynuojums Toma īsuoktajom idejom, turpynuojums džeza muzykai, turpynuojums pīredziejušūs džeza muzyku zynuošonu nūdūšonai jaunajim. Festivala idejis i aizsuokumu degsmi apsajiems uzturēt festivala muokslinīciskais vadeituojs Lauris Amantovs.

Koncertprograma “Džezs dzied Aspaziju” 2018. g. Karteņa: Dagnija Bernāne

Vīns nu festivala mierķu ir veicynuot taišni tūpūšūs džeza muzyku izaugsmi i izgleiteibu, partū festivals suoksīs ar džeza meistarklasem, kurom aicynuoti dasasaceit muzykys školu i augstškolu studenti, tūpūšī muzyki i cyti džeza entuziasti nu treju Baļtejis vaļstu, giustūt profesionalū pīredzi pi Vitys Rusaitītis (Leitova, vokali), Skirmanta Sasnauska (Leitova, tromboni i cyti pyušamī instrumenti), Indriķa Veitnera (Latveja, saksofoni i cyti pyušamī instrumenti), Sīma Aimlys (Siim Aimla, Igauneja, saksofoni i cyti pyušamī instrumenti), Ara Yaralyan (Igauneja, kontrabasi), Madarys Kalninis (Latveja, tausteņinstrumenti). Kai ari vysuos meistarklasēs varēs giut improvizacejis i ansambļa saspēlis prasmis. Meistarklasem aicynuoti dasasaceit ari vysi cyti instrumenti, kab papyldynuotu sovys zynuošonys i vuiceitūs saspēli i improvizaceju ansambļūs, eipaši sytaminstrumentalisti.

Kab pīsadaleitu festivala meistarklasēs, lyugums da 15. juņa aizpiļdeit dasacejuma anketu Lūznovys muižys sātyslopā. Interesenti meistarklasēs var pīsadaleit i kai aktivī daleibnīki, i breivklauseituoju statusā.

Jaunuo festivala džeza muzykys nūtykumus Lūznovā byus aicynuots izdzeivuot sevkurs interesents. Festivalu īsuoks džeza muzyku sadarbeiba meistarklasēs, kuru rezultatu varēs baudeit kasvokora džema sesejuos, bet 30. i 31. augustā nūtiks nazcik publiskūs koncertu – skanēs JVLMA etnodžeza projekta “Etno+džezs”, Sīma Aimlys kvarteta (Igauneja), diksilenda “Sapņu komanda”, muzykys projekta “Sambossa” (Leitova) koncerti, bet festivala nūslāgumā uzastuos Rēzeknis bigbends kūpā ar meistarklašu pasnīdziejim. Koncertu beleti nūpierkami “Biļešu Paradīze” kasēs i internetā.

Baļtejis džeza festivalu Lūznovā atbolsta Rēzeknis nūvoda pošvaļdeiba i Latgolys kulturys programa ar Vaļsts kulturkapitala fonda, AS “Latvijas valsts meži” i Latgolys regiona atteisteibys agenturys finansialu atbolstu. Plašuoka informaceja par pīsadaleišonu festivala “Škiuņa džezs” meistarklasēs: muiza@luznava.lv i +371 29473700 (latvīšu, krīvu, lītuvīšu volūduos) ci +371 29390701 (angļu volūdā). Papyldu informaceja par festivalu Lūznovys muižys sātyslopā.

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]