Rokstu sagataveja: portals lakuga.lv

Pyrma diveju godu dybynuotuos apvīneibys “Latgalīšu reps” panuokumi jau atzeimuoti ar četrim “Boņukim” (2017, 2018), a jūs hits “Žārej gali” itūšaļt “YouTube” vītnē jau puorsnīdzs miljons skatejumus. Nupat “Latgalīšu reps” publiciejs kūpeigu dzīsmi ar Ozolu, zynoms ari, kur hip hopa apvīneibu varēs dzierdēt itymā vosorā.

Apvīneibys nūsaukums radīs vēļ tuolajā 2003. godā, kod ambiciozais puiss Ivo nu Ludzys īraksteja sovu pyrmū dzīsmi “Vysu, kū tu saskoti”. Tūreiz repa īroksts latgalīšu volūdā ceļuoja nu rūkys rūkā, cikom tyka “Radio SWH” alternativajā “Lāga” topā i tautā tyka nūsaukts par “Latgalīšu repu”.

Sovutīs 2018. gods beiguos straumiešonys servisūs palaistuo albuma i superpopularuo hita nūsaukumā īlyktais izteicīņs “žārēt gali” puišim īsamīdzs atmiņā nu 90. godu, kod Ludzys apleicīnē jū dzierdiejuši gona bīži gon tīšā, gon puornastā nūzeimē – pīmāram, par šaļim, kod dzeivē vyss ir kuorteibā, vēļ cyta nūzeime – pavadeit laiku ar sovim tyvajim. Ar itū dzīsmi jī grib pasaceit, ka, nasaverūt iz aizjimteibu, ir juoatrūn breids, lai sasazynuotu i sasatyktu ar draugim, rodim i sev tyvim cylvākim.

“Latgalīšu reps” naapsastuoj sovuos muzykalajuos ambicejuos i īrakstejs dzīsmi kūpā ar vīnu nu Latvejis hip hopa muzykys pamatliciejiem Ozolu.

“Dzīsme “Kūdra Deg” ir stuosts par cylvāka sadroguotū īkšejū stuovūkli, kod kasdinys rutina arviņ vaira roda dažaidus emocionalus puorbaudejumus, kuru rezultātā zyud pacīteiba i ir sajiuta, ka tyuleit ekspluadēs smadzinis, i vyss, kas pi rūkys, liduos pa gaisu. Video paruoda klasiskū kasdīnys stresu, kas rūnās sasaskarūt ar dzeivis īrostajom problemom,” par dzīsmi stuosta Didzis Kozlovs.

Dzīsmis autori ir Didzis Kozlovs, Girts Rozentāls i Ivo Grigalis. Pi video montažys struoduojs Jānis Jēkabsons i Toms Markovs. Dzīsmi var nūsaklauseit ari Spotify, iTunes, Deezer i cytūs straumiešonys servisūs.

Itei vosora hiphopa duetam sūlīs byut eipaši darbeiga. Apvīneiba uzastuos:

23. junī 22.30 Daugovpiļs nūvoda festivalā “Līgo Višķos”,

28. junī 23.00 Reigys naktsklubā “Coyoti fly”,

6. julī Ozola jubilejis koncertā Siguldys piļsdrupu estradē,

12. julī festivalā “Ogle” Saukys dobys parkā,

13. julī hiphopa festivalā “Ghetto Games” Ventspilī,

20. julī Rēzeknis nūvoda svātkūs,

3. augustā festivalā “Summer Sound” Līpuojā,

22. augustā “Andrejostas kvartālā” Reigā,

24. augustā Pylngadeibys svātkūs Ludzā.

Grupa tur nūceju vosoru nūslēgt ar vierīneigu koncertu, tok par vītu i laiku ziņuos vāluok.