Zīmeļlatgolā treju dīnu doncuošona “Eima, eima!”
Rokstu sagataveja: portals lakuga.lv
28.-30. junī Zīmeļlatgolā – Bolvu, Viļakys i Baļtinovys nuvodūs – V Storptautyskais tautys deju festivals “Eima, eima!” kurymā pīsadaleis divdesmit jaunīšu, videjuos paaudzis i senioru deju kolektivi nu Latvejis, Igaunejis i Krīvejis, informej Bolvu nūvoda Turisma informacejis centrs.
Festivala atkluošona nūtiks 28. junī 19.00 stuņdēs Viļakys nūvoda Borisovā, Vacduorza estradē ar koncertu “Saejam dancotāji nu malu maliņām”. 29. junī 14.00 stuņdēs vītejūs festivala daleibnīku i gostu kolektivu izbraukuma koncerts “Ceļojam un dejojam!” Bolvu nūvoda Veiksnā.
Festivala “Eima, eima!” lelkoncerts “Līgosim Pēterdienu!” nūtiks Bolvūs, Bolvu piļsātys estradē, 29. junī 18.00 stuņdēs, pyrma juo – 17.30 stuņdēs festivala daleibnīku svātku guojīņs nu Bolvu Muokslys školys da estradis. Koncertā Bolvūs pīsadaleis pyutieju orkestris “Balvi”, Baļtinovys, Ruguoju, Viļakys, Bolvu nūvoda pīci jaunīšu, seši videjuos paaudzis i div senioru deju kolektivi, senioru deju kolektivs “Ziemeļblāzma” nu Reigys, Tautys deju ansamblis “Līksme” nu Daugovpiļs, Gulbinis 2. vydsškolys jaunīšu deju kolektivs, Litinis pogosta tautys noma jaunīšu deju kolektivs “Litenietis” i treis gostu kolektivi – deju kūpa “Rappivoo” nu Igaunejis, Pleskovys piļsātys saimu deju kūpa “Завалинка” i “Аиша” nu Krīvejis. Itymā lelkoncertā “Līgosim Pēterdienu!” redzēsim vīnuotu uzvadumu ar 13 daņčim. Lelkoncertu vadeis Anda Sergejeva i Aldis Dauksts, muokslinīciskais vadeituojs Agris Veismanis, režisore Ilga Oplucāne.
Piec koncerta – Pīterdīnys zaļumbaļle, kuramā muzicēs “Dvinskas muzikanti”. Īejis moksa iz baļli 4 eiro, festivala daleibnīkim – bez moksys.
Festivala “Eima, eima!” nūslāguma koncerts nūtiks 30. junī 13.00 stuņdēs Baļtinovys parka estradē.
Vysa festivala muokslinīciskais vadeituojs – Agris Veismanis, koncertu režisori: Ineta Lindenberga, Ligita Kacēna, Ilga Oplucāne, Irēna Kaša.
Festivalu organizej i atbolsta: Bolvu, Viļakys i Baļtinovys nūvodu pošvaļdeibys, Latgolys regiona atteisteibys agentura, Vaļsts Kulturkapitala fonds, “Latvejis vaļsts meži”, Bolvu Kulturys i atpyutys centrs.
Koncertūs tiks filmāts i fotografāts.
