Roksta autors: portals lakuga.lv

25.–30. jūnī nūtyka folklorys ekspediceja “Ozolaines pagasta laika zīmes”. Pasuokumā tyka īsaisteiti Rēzeknis Tehnologeju akademejis (RTA) vuiceibspāki i studenti, pogosta tautys noma folklorys kūpa “Zeile”, senioru klubs “Uguntiņa” i Maltys vydsškolys strukturvīneibys “Līpu pamatškola” školāni i pedagogi. Ekspedicejis laikā savuoktūs nūvodpietnīceibys materialus izmontuos Ūzulainis pogosta 80 godu jubilejai veļteitā filmā, gruomotā i cyta veida publikacejuos, kab paruodeitu Ūzulainē saglobuotū socialū atmiņu i namaterialū kulturys montuojumu.

Ekspedicejis vadeišonai atvalinuojuma laiku veļtejuse izgleiteibys i zynuotnis ministre Ilga Šuplinska ar 14 RTA folklorys ekspediceju pīredzi: “Itei ekspediceja maņ eipaša ar tū, ka te ir pyrmuo saskarsme ar cylvākim, kas runoj krīvu volūdā. Minuss, ka krīvim ir mozuok tuo, kū mes saprūtam ar folkloru. Ir tikai ticiejumi, atzinis, padūmi, tys, kū mes sauktu par dzeivisstuostu, a jī ir saistūši i interesanti. Varim īraudzeit, kai viesturiskais, dokumentalais saisteits ar stereotipiskū. Pozitivais ir taišni itī dzeivisstuosti, cytā vidē mes par taidu pīredzi naizzynuotu.

Pyrmajā dīnā dzierdejom par elektrifikacejis lītom, tei beja viesture ar seikom detaļom. Nivīnā gruomotā nav nūfiksāts, kaidā veidā tys izapaude sadzeiviski. Maņ tys palīk kai ekspedicejis īspaideiguokais stuosts. Ari pyrmuos dīnys saruna par grezneibu – kai jū uztvēre agruok i kas ir myusu dīnu grezneiba. Taida saruna ar dziļu izpratni, a cyti appraseitī pat nauztvēre tematu. Vīna grupeņa bejom pi Ūzulainis školys direktoris, kas ite nūstruoduojuse vysu myužu – 44 godus vīnā vītā. Suokuse kai školuotuoja, tod ilgu laiku kai direktore. Juos stuostejums voi plyuda.
Juopīzeist, ka te ir cyta vide, pastuov etniskais i religiskais dalejums. Tū tradicionalū folkloru sagloboj latgaliskais. Īspiejams, ka pi staraveru juoīt staraveram, tod jī ar tevi runuos sovaižuok, jī myus uztver kai svešū. Storp teiciejim beja gona daudz veirīšu, tys ari nav tipiski, partū viesturiskuo materiala savuokts gona daudz.”

Ausma: “Filips salauze munu stereotipu par staraverim, ka jī gona nūslāgti. Jis beja atvārts, ar humoru, stuosteja pat naruotnus stuosteņus…” Evita: “Aizraujūši – kod sapynā redz vīnu kaiminīni, tod dīna byus izadavuse, ka ūtru – tod švaka. Bet tai ari nasaprotom, kaidys attīceibys jam ar kaiminīnem dzeivē.”

Ūzulainis pogosta puorvaļdis vadeituojs Edgars Blinovs: “Pamats sareikuot ekspediceju ir pogosta 80 godu jubileja, 29. decembris ir pogosta oficialuo dzimšonys dīna. Maņ gribējuos kū nūzeimeigu atstuot. Kur mes pi cylvāku bejom, izskanēja interesanta informaceja. Maņ pošam ir daži atkluojumi, svareigi byutu tū cytim izstuosteit. Prīca, ka cylvāki poši zvona i soka, ka jim ir materiali.”