Rokstu sagataveja: portals lakuga.lv

Kab styprynuotu īdzeivuotuoju, školu jaunatnis patriotismu, vaļsts pīdereibys sajiutu, kab paruodeitu Zīmeļlatgolys veiru, Latgolys partizanu pulka varūneibu i davumu Latvejis vaļsts veiduošonā pyrma 100 godu, 5. julī Bolvūs svinēs Latgolys partizanu pulka symtgadi. Itys pasuokums īkļauts Latvejis armejis i Naatkareibys kara symtgadis centralūs pasuokumu plānā, informej Bolvu nūvoda pošvaļdeibys sabīdryskūs attīceibu specialiste Iluta Mežule.

Pasuokuma programā:
13.00 stuņdēs Svātku dīnys “Latgales partizānu pulkam 100” i ekspozicejis “Ziemeļlatgale Latvijas neatkarībai” atkluošona Bolvu Nūvoda muzejā.

14.00 stuņdēs Militarais displejs (bruņutehnikys parade, militaruos stafetis i tml.) laukumā pi Bolvu Kulturys i atpyutys centra.

18.00 stuņdēs Svineiga šaļteņa pi pīminekļa Latgolys partizanu pulka krytušajim karaveirim. Uzastuos Kanadys Bruņuotūs spāku Centralais orkestris.

19.00 stuņdēs Svātku koncerts, kurā muzicēs veiru ansamblis “Dobeles zemessargi” Bolvu piļsātys parka estradē.

Latvejis Naatkareibys kara viesturē daudz spūdru puslopu īrakstejs Latgolys partizanu pulks, kura veiduošonuos i kauju gaitys saisteitys ar Zīmeļlatgolu i Bolvim.

Latgolys partizanu pulks ir sovpateigs, natradicionals militars formiejums – jis jau beja izceiniejs seivys kaujis i aizstuoviejs frontis lineju 50 km garumā, kod 1919. gods 5. julī guoja Austrumu frontis vierspavieļnīka paviele Nr. 869, kura nūsauc Bolvu Partizanu vīneibu par Latgolys partizanu pulku i īkļaun jū Latvejis armejis sastuovā. Latgolys partizanu pulks 1919. godā nūsorguoja Austrumu frontis zīmeļu sektoru laikā, kod pi Daugovys tyka izceineitys izškirūšys kaujis pret Bermonta karaspāku. Pulks pastuovēja da Padūmu Krīvejis i Latvejis Republikys mīra leiguma nūsliegšonai, vāluok izformāts – īkļaunūt cytūs Latvejis armejis formiejumūs.

Zīmeļlatgolys atbreivuošona Latgolys partizanu pulkam beja nūpītnuokais puorbaudejums vysā juo kauju viesturē.

Kab gūdynuotu krytušūs karaveiru pīmiņu, piec Naatkareibys kara cēle pīminekļus, īkuortuoja pīminis vītys Bolvūs, Viļakā, Baļtinovā, Škilbānūs, Ruguojūs, Tiļžā, Kuorsovā, Lynovys pogosta Reitupē, Kacānu pogostā (obeji pādejī niule Krīvejis Federacejis teritorejā).