Bolvūs apsaverama Inārys Grocis gleznu izstuode

Bolvūs apsaverama Inārys Grocis gleznu izstuode

Roksta autors: portals lakuga.lv

Da 30. juļa Bolvu Centralajā bibliotekā apsaverama Inārys Grocis gleznu izstuode “Tumši zilā”. Daudzim Inārys, projektu vadeituojis i žurnala “A12” redaktoris, interesantuo valisprīca ir nagaideits puorsteigums i – lai īdvesmoj cytus pīpiļdeit sovus radūšūs sapynus. Inārai vīna personalizstuode jau bejuse Rēzeknis nūvoda dūmē.

Par sovu personalizstuodi stuosta poša autore I. Groce: “Asmu muokslys draugs, profesionali gleznuot i zeimēt naasmu vuicejusēs. Pyrmū reizi kūpā ar draudzinem nūlēmem gleznuot pučis pyrma kaidu godu pīcu. Nūorganizējom muokslys interesentu kūpu i aicynuojom muokslineicys Agru Ritiņu i Ingu Onževu vuiceit gleznuošonys pamatus pīaugušajim. Tys vysim īsapatyka – i gleznuošona kai dvēselis terapeja, i īspieja radeit pasauļa apgrīztū tālu iz audakla, taidu, kaidu mes jū redzim. Niule kotru vosoru kūpā dūdamēs plenerūs – iz Rāznys stuovkrostim, pi Latgolys dobys i pīpyldom audaklus ar sovu prīcu i puordūmom. Itūšaļt munys meiluokuos pučis ir peonejis, bierneibā juos redziejuos tik vacmūdeigys, niule – kruosu i smaržu puorpylnys. Izstuodē ir vairuokys peoneju gleznys.

Itei ir muna ūtruo personalizstuode i nūsaukums “Tumši zilā” partū  – ka tei ir muna meiluokuo kruosa. Pyrmī dorbi beja viņ zylūs tūņūs, tikai piec tam es atrodu puorejūs. Tymsi zyls ir vokors, kod lānom rosa pīpylda zuoli i vysi dorbi ir padareiti, var baudeit vīnkuorši asameibu. Tymsi zyli ir dabasi pyrma saulislākta, tymsi zylūs dabasūs speid ari vysspūdruokuos zvaigznis. Kotra sīvīte ir radeituoja. Var dzīduot i doncuot, ci pajimt rūkuos ūtu i radeit sovu tālu iz audakla.”