Rokstu sagataveja: portals lakuga.lv
12. julī jau timseņā praseiti gostūs Grebļa kolnā (Zylupis nūvoda Pasīnis pogosta Meikšānūs). 23.00 stuņdēs entomologa stuosti, taurynu gaismuošona, organizāta nakts pastaiga pa osu. 2.00 stuņdēs puļciešonuos pi Austrys kūka 6,4 km garam nakts puorguojīņam “Dabas un vēstures vērtības pierobežā”, informej Ilga Ivanova.

Grebļa kolns ir dobys līgums ar eipatneju mikroklimatu i augu vaļsti. Leluokuo taurynu populacejis vīta Baļtejis vaļstīs (ap 500 sugu) i vairuokys te sastūpamūs augu i taurynu sugys ir īraksteitys Latvejis Sorkonajā gruomotā. Pats kolns izaveiduojs pyrma kaidu 14 miljonu godu. Tys ir vīneigais taida veida objekts Latvejā.

Itei 5,4 km garuo osu grāda Pintu azara zīmeļaustrumu krostā pasaceļ da 30 m par apleicīnis mežim i pūrim. Kolna nūguozis ir stuovys, viersyune nu 1 da 7 m plota, bet pamatne – nu 50 da 150 m plota. Grebļa kolna dīnvydu daļā nu austrumu apskoloj Šešku azars, bet nu rītumu – Pintu azars. Šauruos osu grādys golūs atsarūn senejī Meikšānu i Kausa piļskolni. Ite jau 1957. godā izveiduots botaniskais līgums 212,3 ha plateibā.

Kasdīnā mudynojam nūvoda gostus ar sovu kluotīni naapgryutynuot taurynu paradizi, i pateiceibā par leidzcylvāku sapratni vīnu reizi godā prosom gostūs. Nakts tauryni tik cīš atsaškir nu sovu dīnys sugys bruoļu!
Apcīmuojumam izalosit pīmāruotys drēbis. Labi nūderēs pretinsektu leidzeklis, plēve ci beņčeits siediešonai, luktureits. Apmeklejūt leidza juobyun dereigai pasei (ID kartei) i rūbežsardzis izdūtai caurlaidei, kas ļaun uzaturēt pīrūbežys jūslā. Kab ceļuojums pīrūbežā byutu pateikamuoks, lyugums caurlaidi nūformēt sovlaiceigi.

Transportu nūvītojam pi Austrys kūka. Tuoļuok 1,2 km dūdamēs kuojom ci zyrga pajiugā (2 eiro nu personys). Daleibai puorguojīnī 5 eiro nu personys, cenā īkļautys reitiškys reitausmā.

Atbiļdis iz vysim vaicuojumim vālams nūskaidruot pyrma apcīmuojuma, zvonūt +371 28656530 ci rokstūt ilgaivanova@inbox.lv, partū ka pasuokuma nūtikšonys vītā sakari ir traucāti.