Latgolā 10. reizi vargaņu dīnys

Latgolā 10. reizi vargaņu dīnys

Rokstu sagatveja: lakuga.lv

Nu 12. da 27. juļa Latgolā nūtiks 10. storptautyskais festivals “Latgales ērģeļu dienas 2019” koncerti. Itūgod byus vareiba baudeit 9 augstvierteigus koncertus. Jubilejai par gūdu, festivals pyrmū reizi izīt uorpus bazneicys – jaunūs stabuļu vargaņu īskandynuošonys koncerts Juoņa Ivanova Rēzeknis muzykys vydsškolā, kur pīredziejušūs Krīvejis muzyku Denisa Mahaņkova i Dinys Ikhinys vadeibā nūtiks ari meistarklasis jaunajim varganistim, informej festivala organizatore Larisa Carjkova.

Itūgod festivalā pīsadola vairuoki izcyli muokslinīki: vijūļneica Paula Šūmane, arfiste Ieva Šablovska, dzīduotuoji Dainis Skutelis i Agnese Urka, varganisti Diāna Jaunzeme-Portnaja, Iveta Pelše, Larisa Carjkova, Digna Markule, varganistu duets Deniss Mahaņkovs i Dina Ikhina (Krīveja) i daudzi cyti. Festivala eipašī gosti – Jāzepa Vītola Latvejis Muzykys akademejis vargaņu klasis vadeituoja, profesore Vita Kalnciema, nazcik storptautysku konkursu laureate Liene Andreta Kalnciema i jaunuo, talanteiguo dzīduotuoja Laura Purena.

Tradicionali vīns nu festivala koncertu byus jaunūs varganistu snāgums, kurymā pīsadola Latgolys muzykys školu i vydsškolu audziekni. Itūgod jaunī muzyki pīskandynuos Bolvu luteraņu bazneicu.

Kab muzykys baudejums byutu piļneiguoks, ar video projekcejis paleidzeibu klauseituoji varēs vāruot muokslinīku prīšknasumu tyvplanā, redzēt emocejis i izpiļdejuma tehniskuos niansis. Turpynojūt tradiceju, vysi interesenti piec kotra koncerta ir aicynuoti tyvuok īsapazeit ar konkretūs vargaņu uzbyuvi i darbeibys pryncypim, kai ari pīredziejušu muokslinīku pavadeibā pamuzicēt poši.

Festivals “Latgales ērģeļu dienas” ir lobdareibys projekts i īeja vysūs juo koncertūs ir par zīduojumim, kas itūgod tiks nūvierzeiti Tiļžys bazneicys vargaņu atjaunuošonai. Jau dasmytū godu festivals puļcej breineigus muzykus, kuri ar sovu talantu atbolsta Latgolys dīvnomūs asūšūs stabuļu vargaņu atdzimšonu i saglobuošonu. Festivala mierkis ir popularizēt vargaņu spēlis kulturu i latvīšu vargaņu muokslu, atbaļsteit vargaņu uzturiešonu i apkūpi, kai ari vēļreiz aplīcynuot tū, ka Latgola i Latveja var lapnuotīs ar daudzim spūdrim varganistim. Projektu atbolsta Vaļsts Kulturkapitala fonds, “Latvijas Valsts meži”, Latgolys regiona plānuošonys agentura, Latvīšu fonds, Krustpiļs, Kuorsovys, Kruoslovys pošvaļdeibys, Rēzeknis Turisma i kulturys centrs, Rēzeknis-Aglyunys dieceze i c.

Storptautyskuo festivala “Latgales ērģeļu dienas 2019” kocertu nūtikšonys:

12. julī 21.00 Stiernīnis Sv. Laurencija Rūmys katuoļu bazneicā koncerts “STIRNIENES ĒRĢEĻU NAKTS”.
Pīsadola: Ilze Vizule (varganis), Gunta Greisle i Ainārs Kiserovskis (bolss), kors “Reversium” (dirigents Jānis Gruduls), Malnovys draudzis kors i eipašī gosti.

14. julī 18.00 (piec sv. misis 17.00) Krustpiļs Vyssvātuokuos Treisvīneibys Rūmys katuoļu baznieicā koncerts “TEICI TO KUNGU”.
Pīsadola: Diāna Jaunzeme-Portnaja (varganis), Ieva Šablovska (arfa)

17. julī 18.00 Leiksnys Vyssvātuos Jezus Sirds Rūmys katuoļu bazneicā koncerts “VAKARA LŪGŠANA”.
Pīsadola: Digna Markule (varganis), Viktors Veļičko (kontrabass), Aleksandrs Veļičko, Jānis Veļičko, Pēteris Veļičko, Pāvels Veļičko (bolss)

19. julī 18.00 Malnovys (Kuorsovys) Rūžukrūņa Dīvamuotis Rūmys katuoļu bazneicā “ĪPAŠO VIESU KONCERTS“.
Pīsadola: Vita Kalnciema, Liene Andreta Kalnciema (varganis), Laura Purena (soprans)

20. julī 11.00 Bolvu luteraņu bazneicā “TOPOŠO ĒRĢELNIEKU KONCERTS”.
Pīsadola: Latgolys regiona muzykys školu i vydsškolu audzeiekni, Bolvu Muzykys školys audziekni i pedagogi.

21. julī 14.00 Vydsmuižys Sv. Gora Rūmys katuoļu bazneicā “SENĀS MŪZIKAS KONCERTS“.
Pīsadola: Larisa Carjkova (varganis).

21. julī 18.00 Izvoltys Sv. Annys Rūmys katuoļu bazneicā koncerts “LATGALES ĒRĢEĻU GAISMA”.
Pīsadola: Iveta Pelše (varganis), Dainis Skutelis (bolss), Kārlis Jēkabsons (trompete).

26. julī 13.00–17.30 J. Ivanova Rēzeknis muzykys vydsškolā nūtiks vargaņu spēlis meistarklasis Latgolys regiona jaunajim varganistim i vargaņu īsvieteišonys svātbreids ar veiskupu Jāni Buli.
Vadeituoji: Deniss Mahaņkovs i Dina Ikhina (Krīveja)

26. julī 18.00 J. Ivanova Rēzeknis muzykys vydsškolā “JAUNO STABUĻU ĒRĢEĻU IESKANIDINĀŠANAS KONCERTS” Lelajā zālē.
Piedalās: Deniss Mahaņkovs un Dina Ikhina (ērģeļu duets, Krievija)

27. julī 19.00 Rēzeknis Jezus Sirds katedralē “NOSLĒGUMA KONCERTS“.
Pīsadola: Dina Ikhina, Deniss Mahaņkovs (varganis, Krīveja), Paula Šūmane (vijūle), Agnese Urka (soprans), Larisa Carjkova (varganis).