Suocās akceja “Zalta rūku ceļš Latgolā”

Suocās akceja “Zalta rūku ceļš Latgolā”

Rokstu sagataveja: portals lakuga.lv

Nu 16. juļa da 16. novembra Latgolys Muokslys i amatnīceibys centrs (LMAC) kūpā ar Ludzys amatnīku centru (LAC) ari itūvosor organizej akceju Latgolys apceļuotuojim “Zalta rūku ceļš Latgolā”, aicynojūt īpazeit Latgolu caur omotu tradicejom. Akcejis laikā byus vareiba īpazeit 42 Latgolys amatnīku darbneicys, kur apmaklātuojs var ībraukt, apsavērt, pasadorbuot, viestej LMAC/ Leivuona stykla muzeja sātyslopa.

Itei akceja ir vīneigais itaida veida produkts Latgolā. Regiona leluokuo boguoteiba sliepās juos darbeigajā vidē i unikalajā kulturys montuojumā, kas ļaun apsavērt i izprast latgaliskuos kulturvidis sovpateibu i kulturys montuojuma “dzeivuos” vierteibys – pošam dorbuotīs i koč kū izveiduot, redzēt amatnīkus darbeibā, kai ari īpazeit Latgolys sadzeivi, folkloru, muokslu. Amatnīks ir Latgolys vierteiba. Ar akcejis paleidzeibu organizatori grib mudynuot īpazeit Latgolu caur omotu tradicejom.

Kab pīsadaleitu akcejā, sovu ceļuojumu vajag suokt vīnā nu diveju amatnīku centru – LMAC Leivuonā ci LAC Ludzā. Projektā ir izstruoduotys akcejis kartis, kurys var sajimt, suocūt ceļuojumu vīnā nu centru. Apmeklejūt kaidu nu amatnīku darbneicu, akcejis kartē varēs dabuot amatnīka autografu. Paruodūt itū karti ar vysmoz pīcu amatnīku parokstim vīnā nu suokuma punktu, Leivuonā ci Ludzā, tiks izsnāgts sertifikats par darbneicu apmekliejumu.

Akcejis laikā aicynojam ceļuotuojus daleitīs ar sovim īspaidim socialajūs teiklūs facebook.com i Instagram lopā – Zalta rūku ceļš Latgolā.
Goda nūgalē – decembrī Leivuonā, LMAC paradzāts nūslāguma pasuokums Latgolys amatnīkim, akcejis daleibnīkim ar dūmu puorrunuot akcejis nūtikšonu i sasatikt, daleitīs pīredzē. Ceļuotuojim tiks izlūzātys vierteigys bolvys nu omotu meistaru.

Akceja rodusēs Vaļsts kulturkapitala fonda i Latvejis Vaļsts mežu atbaļsteituos Latgolys kulturys programys projektu rezultatā. Projekta pasuokumi veicynuos latgaliskuos kulturvidis i volūdys populariziešonu, kai ari motivēs vītejūs amatnīkus saglobuot sovys vierteibys i omotu, kū jī praktizej. Projekta realizaceja ļaus veiduotīs jaunim kulturys kontaktim, dūs vareibu jaunajim orūdu apgiviejim vuiceitīs nu asūšūs amatnīku. Piec akcejis karte kolpuos kai informativs materials par Latgolys amatnīku darbneicom.