Jauns raidejums par medejprateibu

Jauns raidejums par medejprateibu

Rokstu sagatveja: portals lakuga.lv

22. julī 14.00 stuņdēs kanalā “RīgaTV 24”, kai ari 23. julī 14.00 i 19.00 stuņdēs kanalā “Re:TV” nūsaverams raidejumu cykla “Dezinformācijas varā?!” pyrmais raidejums. Septeni raidejumi byus par dezinformaceju medejūs, ar mierki nūskaidruot i informēt, voi tei ir sastūpama vysur – radejā, televizejā, laikrokstūs i žurnalūs, kai ari škārsteiklā, informej projekta vadeituoja, Latgolys regionaluo televizejis žurnaliste Beatrise Jakobsone.

Da 2020. gods janvara beigu Latgolys regionaluo televizeja (LRT) veidoj div raidejumu cyklus par medejprateibu. Vīns nu jūs – “Latgales pierobeža – vieta, kur sākas Eiropas Savienība!” – TV ekranūs ir jau nu ituo gods juņa. Izreiz piec TV puorraidis raidejumi atrūnami ari platformā xtv.lv, kai ari sātys lopā lrtv.lv i LRT socialūs teiklu kontūs. Itūs raidejumu laikā LRT žurnalistis Beatrise Jakobsone, Ausma Sprukte i Svetlana Dudarenoka uzrunuos vysaidu medeju puorstuovus, uzklauseis jūs redzīni par dezinformaceju i kai jī ceinuos, kab napīļautu juos publiskuošonu. Taipat tiks uzrunuoti ari Latvejis īdzeivuotuoji, kab nūskaidruotu, kaidus medejus jī patierej, i caur vysaidu aizdavumu piļdeišonu izpieteitu, ci jī izprūt, kas ir dezinformaceja, i voi spiej kritiski viertēt medeju saturu. Raidejumu laikā par dezinformacejis temu žurnalistis diskutēs ari ar medejprateibys eksperti, Vaļsts policejis puorstuovim i juristu.

Pyrmajā raidejumā eksperte, Rēzeknis Tehnologeju akademejis docente Sandra Murinska, stuosteis, kas ir dezinformaceja medejūs, cik lela problema itūšaļt tei ir i kai stuotīs pretim dezinformacejai. Taipat kūpā ar LRT žurnalistem īskicēs, kai atpazeit vyltus zinis.

Raidejumu cyklys “Dezinformācijas varā?!” teik veiduots, pasateicūt giutajam atbolstam programā “Reģionālo un vietējo mediju atbalsta programma”. Projektu finansej Medeju atbolsta fonds nu Latvejis vaļsts budžeta leidzekļu.

Print Friendly, PDF & Email

Nūtikšonu kalendars