Rokstu sagataveja: portals lakuga.lv

Da 10. augusta (īskaitūt) dāmys var dasasaceit auto orientiešonuos saceņseibom sīvītem “Prieka tūre”, kas nūtiks 17. augustā Bolvu nūvodā. Atraktivuos auto turisma saceņseibys ar vysaida rakstura papyldu aizdavumim jau catūrtū godu organizej Bolvu Sporta centrs sadarbeibā ar balvinītem Ilzi Gļaudu, Dagniju Vaickovsku i Santu Raciborsku, informej Bolvu nūvoda pošvaļdeibys sabīdryskūs attīceibu specialiste Iluta Mežule.

Itūgod maršruts byus ap 250 km i vess pa sešu nūvodu teritorejom. Brauciejis gaideis amizanti, sarežgeiti i zynuošonys prosūši aizdavumi, byus juoatrūn vysaidi objekti piec fotografejis. Taipat kai īprīškejūs godus, ari itūreiz ekipažā obligati vajadzeigys div daleibneicys – pilote i styurmane, bet mašynā dreikst byut pasažeris (tikai sīvītis). Ekipažu kusteiba nūtiks atbylstūši organizatoru izstruoduotajam maršrutam pa vyspuorejuos lītuošonys celim, kuri natiks slāgti publiskai satiksmei, breivi orientejūtīs kartē ci sekojūt legendai, kai ari kontrolpunktūs veicūt eipašus aizdavumus.

Ralleja daleibneicom juoīvāroj Latvejis Republikys Ceļu satiksmis nūsacejumi i automašynai juoatbylst vysom praseibom, kū izstruoduojuse Ceļu satiksmis drūšeibys direkceja.

Pasuokuma suokums nu 11.00 stuņžu ar īsarasšonu, tehniskū komiseju i registraceju laukumā pi Bolvu Kulturys i atpyutys centra, nu kurīnis ari svineigais starts 12.00 stuņdēs. 15.00–18.30 stuņdēs gaideis dāmu ekipažys finiša punktā pi Kubulu pogosta Kulturys noma, bet nu 20.00 byus apbolvuošona i nominaceju padūšona, i piec tam balle kūpā ar grupu “Tonick” nu Cāsu, DJ Čivix i DJ ML.

Pyrmuos treis ekipažys tiks apbolvuotys ar medaļom, kausim i organizatoru saryupātom bolvom, nu kurūs golvonuo ir SPA 4 personom Palangā (Leitovā), kai ari bolvys nu Latgolys viestnīceibys “GORS” i SIA “Wake Up” (Bolvi), sumynuotys tiks ari ekipažys nūteiktuos nominacejuos.

Šyunit tārpus, plānojit, kai rūtuot auto, i izdūmojit strategeju, kū i kai dareit. Dasacejumā (da 10. augusta īskaitūt) juonūruoda komandys nūsaukums; pilotis i styurmanis vuords, uzvuords; auto registracejis numers; kontaktinformaceju – e-postu i telefona numers; rokstūt iz e-postu: prieka_ture@inbox.lv. Smolkuoka informaceja pa telefonu: 29336428.