Rokstu sagataveja: portals lakuga.lv

27.–28. julī Atašīnē tradicionali svinēs Annys i Jākubus aba Saimineicu i Saiminīku dīnu, plašuokā mārūgā tys nūtiks jau 10. reizi. Svātkūs IV folklorys kūpu saīts “Atašīnis suseklis” puļcēs tyvuokys i tuoļuokys folklorys kūpys, informej Atašīnis pogosta kulturys dorba organizatore Vēsma Turkopole.

Svātuo Anna ir Atašīnis aizbiļdne. Svietejūt Annys dīnu, gūdynojam ari seņčus, partū ka taišni jī Annu izalasejuši par sovu aizbiļdni. Svātku pasuokumi 27. julī suoksīs 10.00 stuņdēs ar Sv. Misi Annys gūdam Atašīnis Suopu Dīvamuotis Rūmys katuoļu bazneicā.

Annys i Jākuba dīnys atkluošona nūtiks Atašīnis kulturys noma “Annys sāta” pogolmā 11.30 stuņdēs. Vysys dīnys garumā iz Annys dīnys tierdzeņu teik praseiti pierkt i puordūt grybātuoji. Doncuos deju ansambli “Pērle” i “Rits” (Reiga), dzīduos “Upes muzikanti”. Tiks registrātys i gūdynuotys Annys i Jākubi, kai ari 14.20 stuņdēs Krustpiļs nūvoda sakūptuokūs sātu saimineicys i saiminīki. Iz guņskura čakluos Atašīnis saimineicys virs eipašū Annys dīnys zupu, ituo gods kulinaruo konkursa tēma – muna plātsmaize. Byus kļovu lopu capuru darynuošonys radūšuo darbneica, izjuodis ar zyrgim, 16.30 stuņdēs nūtiks vysaidys jautrys izdareibys, saceņseibys – Annys nesšona, “Māslu tolka”, “Umurkumurs”, pupeņu laseišona, saimineicu skriejīņs i daudz kas cyts. Bārni varēs priecuotīs putu balleitē “Annas tantes veļas baļļā”.

15.00 stuņdēs koncerts “Atašīnis suseklis”. Itys interesantais nūsaukums folklorys kūpu saītam pajimts nu Atašīnē pīraksteitys dzīsmis i daņča. Jimā pīsadaleis boltkrīvu folklorys kūpa “Jazynka” i kolektivi nu Latvejis nūvodu: folklorys kūpys “Turki”, “Rūžupis veiri” (Leivuona nūv.), Varakļuonu folklorys kūpa (Varakļuonu nūv.), “Naktineica” (Preiļu nūv.), “Mežābele” (Streņču nūv.), “Vīraksne” “Lākači” (Krustpiļs nūv.). Doncuos “Zvirbuļi”, “Dance”, “Latiņš”.

Vokora daļā, 19.00 stuņdēs, dzeivis prīca i durneibys gors kūpā ar Reigys teatru akterim, breivdobys izruodē piec A. Brigaderis lugys motivim “Lielais loms”. Režisori Juris Kalniņš i Voldemārs Šoriņš. Lūmuos: Artis Drozdovs, Romāns Bargais, Evija Skulte, Voldemārs Šoriņš, Indra Burkovska, Raimonda Vazdika, Ance Kukule, Aīda Ozoliņa, Dace Makovska, Juris Kalniņš ci Jānis Kirmuška. Horeografe Raimonda Vazdika, producente Aīda Ozoliņa. Luga aizsauks laikūs, kod dabasi beja zyluoki i zuole zaļuoka, a ļauds taidi poši kai šudiņ – mīlesteibys olkstūši i meklejūši. Svīžūt laipu iz īcarātuos sirdi, teik lykti lītā vysaidi tryki – “improvizaceja”, “interpretaceja”, “traktiešona” i “fraktiešona”… I koč ari itūs jiedzīņu skaidruojumu bīži naizprūt ari poši izruodis varūni, tys natraucej tikt pi laimeigu beigu – puoru dabuošonuos.

Zaļumballe 22.00 stuņdēs da reita gaiļu kūpā ar grupu “Zelta jauda”.

28. julī 11.00 stuņdēs Atašīnis bazneicā Sv. Mise – Annys dīnu nūslādzūt. Piec tuo 13.00 stuņdēs kopusvātki Atašīnis kopūs.