Tiļžā kūpīnys teatra īstudiejums “Breinuma līpa”

Tiļžā kūpīnys teatra īstudiejums “Breinuma līpa”

Rokstu sagataveja: portals lakuga.lv

27. julī 15.00 stuņdēs Tiļžys pogosta svātku ītvarūs laikmeteiga Tiļžys kūpīnys teatra īstudiejuma “Breinuma līpa” pyrmizruode. Luga pīgrīzs sabīdreibys viereibu iz cīma suopeiguokajom problemom: Tiļžys internatpamatškolys sliegšona, cīma nuokūtne i ciļvieciskuos nasaskanis, jaunīšu aizbraukšona nu Tiļžys, informej bīdreibys “NextHorizont” projekta vadeituoja, izruodis režisore Inese Daukste.

Īstudiejuma pamatā izmontuotys intervejis ar Tiļžys cīma vītejim īdzeivuotuojim, ar verbatim teatra metodi juos atdzeivynojūt auditorejai i rodūt vīnuotu stuostu. Tei byus staigojama izruode Tiļžys cīma treis dažaiduos vītuos, ar simulātom nūtikšonom Tiļžys internatpamatškolā, kulturys nomā i tierga laukumā cīma centrā. Skateituoji varēs pīsadaleit pādejuos vakariņuos Tiļžys internatpamatškolā, īsaisteit debatēs par cīma nuokūtni i pīsadaleit jaunīšu diskotekā Tiļžys cīma centrā.

Itys īstudiejums ir vierīneigs storpdisciplinars projekts, kura centrā ir Tiļža – apdzeivuota vīta Bolvu nūvodā, Latgolā. Projekta iniciatore, amaterteatru režisore Inese Daukste 2018. godā apgiva prasmis laikmeteigu kopīnys teatru īstudiejumu veiduošonā projekta “Latvijas stāsti. Šekspīrs satiek Blaumani” ītvorūs. Īceri projekta ūtrajai daļai – rekomendejūt īstudiešonai – izvierzeja režisori i eksperti: Jans Villems van den Boss, Pauls Murejs, Kārena Glosopa (Lelbritaneja) i projekta “Latvijas stāsti. Šekspīrs satiek Blaumani” vadeiba (fonds “Initium”) nu Latvejis pusis.

Par kūpīnys teatra byuteibu LU Humanitarūs zynuotņu fakultatis folkloristikys studeņte Zane Grudule: “Kūpīna – sociala grupa, kuru vīnoj kūpeiga dzeivisvīta, tradicejis, pīredze ci kaidys interesis. Kūpīnys teatris pasaulī ir plaši pazeistams, a Latvejis amaterteatrūs par itū da šam beja moz kas zynoms, kur vēļ izmontuots praksē. Tys sevī apvīnoj na viņ vairuokys profesionaluo i amaterteatra formys i metodis, tok ari antropologejis, stuostnīceibys i folkloristikys elementus, partū ka golvonais kūpīnys teatra mierkis ir izzynuot kaidys kūpīnys fenomenus, sovpateibys i stuostus, kas ir nūzeimeigi itim cylvākim, tai na viņ pošim akterim, bet ari kūpīnys daleibnīkim līkūt saprast, cik jī ir breineigi. Nu molys jau vīgļuok saredzēt vysu skaistū, kasdīnā pasleidūšū garom.”

Īstudiejuma “Breinuma līpa” režisore Inese Daukste, režejis konsultants – J. V. van den Boss (Lelbritaneja, Dailis teatra uorštata režisors), horeografe Alise Putniņa, dramaturgs Edgars Niklasons, komponists Jēkabs Nīmanis i c. Īstudiejumā apsavīnoj Tiļžys amaterteatris “Spogulis” (režisore Inese Daukste), Tiļžys Kulturys noma (KN) Bārnu i jaunīšu dramatiskais kolektivs (režisore Astrīda Ivanova), Tiļžys KN deju kolektivs “Palazdīte” (vadeituoja Daiga Lukjanova), Tiļžys KN sīvīšu kors “Varavīksne” (vadeituoja Rita Smuška), Tiļžys KN etnografiskais ansamblis “Sagša” (vadeituoja Daiga Jēkabsone), Vactiļžys amaterteatris “Melnais kaķis” i Bolvu Kulturys i atpyutys centra Teatra studeja (režisore Inese Daukste). Īstudiejumam pīsavīnoj Veiksnys KN dramatiskuo kolektiva “Krams” daleibnīki (vadeituoja Jolanta Sauleviča-Logina).

Tiļžys cīms ir unikals ar sovu izaceļšonys viesturi, kulturviesturiskajim objektim, multikulturalu sabīdreibu i vidi. Par tū līcynoj četru kristeigūs konfeseju – katuoļu, luteraņu, pareizticeigūs, baptistu dīvnomi Tiļžys cīma teritorejā. Tiļža ir vīta, kur vysi Latvejis nūvodi sasateik ar Latgolu. Daļa Tiļžys īdzeivuotuoju jiutās kai īguojieji, partū ka saknis meklejamys Vydzemē, Zemgalē, Kūrzemē, i skaidrā latgalīšu mēlē sauc sevi par čyulim (nalatgalīšim), a daļai īdzeivuotuoju seņču saknis īt nu Krīvzemis. Kai ir bejs izdzeivuot, sadzeivuot, atsateisteit, dorbuotīs tik multikulturalā vidē, vysaidūs viesturis leiklūčūs? Kas ar Tiļžu nūtiks nuokūtnē, ci jei pagaiss, aizraunūt sev leidza kulturviesturiskuos vierteibys i montuojumu?

Īstudiejuma režisore Inese Daukste soka lelu paļdis LU Humanitarūs zynuotņu fakultatis folkloristikys studentem Ilgai Vālodzei-Ābelei i Z. Grudulei, kurys devēs ekspedicejā iz Tiļžu, kab tyktūs ar Tiļžys cīma īdzeivuotuojim, īraksteitu intervejis, kurys tiks izmontuotys īstudiejumā. Paļdis ari atsauceigajim ļaudim Tiļžā: Ainai Zelčai, Olgai Zelčai, Irēnai Laupacei, Janīnai Ločai, Alīdai Ločmele, Jēkabam i Ilgai Zelčiem, Pēterim Mičulim, Ruttai Silauniecei, Konstantīnam nu baptistu draudzis, prīsteram Staņislavam Prikulim, breineigajam puoram nu Vactiļžys – Domicellai i Jānim Loginiem.Plašuokai informacejai var paskaiteit Z. Grudulis rokstus “Latvijas stāsti. Šekspīrs satiek Blaumani. Tilžas stāsti. Čiuļs sateik čangali” portalā ubisunt.lu.lv  par Tiļžys ekspedicejā pīdzeivuotū, radzātū, dzierdātū i sajustū. Projektu realizej bīdreiba “NextHorizont”. Īstudiejums tūp ar “LV100@Latvijas Republikas Kultūras ministrija”, Latvejis Nacionaluo kulturys centra, “The British Council Latvia” i Latgolys kulturys programys atbolstu i finansiejumu.

Print Friendly, PDF & Email

Nūtikšonu kalendars