Rokstu sagataveja: portals lakuga.lv

Da 9. septembram gaida dasacejumus Nikodema Rancāna vuordā nūsauktuo konkursa ītvorā, kab jau pīktū godu piec kuortys padūtu bolvys lobuokajim Latgolys pedagogim, informej Latgalīšu kulturys bīdreiba.

Nominantus bolvai var dasaceit pīcuos kategorejuos: par latgalīšu volūdys, kulturviesturis i nūvodvuiceibys populariziešonu i īvīsšonu vuiceibu ci studeju vidē; par inovativu metodikys lītuojumu apvuiceibys procesā; par myusdīneigu i radūšu pīeju školānu dorba tykuma audzynuošonai i omotu apvuiceibai; par veiksmeigu debeju (pedagogim na vairuok kai ar 3 godu dorba stažu) i par latviskuos i latgaliskuos kulturvidis veiduošonu pyrmsškolys izgleiteibys īstuodēs. Pīktuo nominaceja ir guojuse kluot piec pošu pedagogu lyuguma, kai ari apyldu var tikt dašliertys ari cytys bolvys piec izviertiešonys i žurejis lāmuma, nūruoda organizatori.

Nikodema Rancāna konkursa bolvu ir īdybynuojuse Latgalīšu kulturys bīdreiba i konkursu reikoj sadarbeibā ar Rēzeknis Tehnologiju akademeju i vysom Latgolys pašvaļdeibom. Itūgod konkursa sareikuošonā ir īsasaistejuse Latgolys planavuošonys regiona Atteisteibys padūme.

Konkursa mierkis ir styprynuot pedagoga profesejis prestižu i atpazeistameibu sabīdreibā, gūdynojūt izcylu veikumu pedagogiskajā darbeibā, latviskuos i latgaliskuos kulturys tradiceju īaudzynuošonu jaunajā paaudzē.

Bolva nūsaukta par gūdu izcylajam katuoļu goreidznīkam i pedagogam Nikodemam Rancānam (1870–1933), Latgolys pyrmuos atmūdys darbinīkam ar īspaideigu davumu Latgolys kulturā i izgleiteibā. N. Rancāna bolvys pretendentus vairuokuos nominacejuos, pīmynūt juo daudzveideigū darbeibu, izviertēs Latgolys planavuošonys regiona Atteisteibys padūmis apstyprynuota žureja, kurys sastuovā aicynuoti Izgleiteibys i zynuotnis ministrejis, Latgolys pašvaļdeibu puorstuovi, izgleiteibys i kulturys darbinīki. Bolvys padūšonys svineiguo ceremoneja kotru godu teik reikuota kaidā nu Latgolys pašvaļdeibom. Itūgod nūslāguma pasuokums nūtiks 22. septembrī Rēzeknis Tehnologiju akademejis telpuos. Īprīškejūs godūs bolvys padūšonys ceremoneja ir nūtykuse kai Rēzeknē, tai Ludzā, Viļānūs i Preiļūs.

“Esit atsauceigi i nataupit lobūs vuordus školuotuojim, kas kotru gadu styprynoj Latvejis sabīdreibu i guodoj par jaunuos paaudzis izgleituošonu! Apsaverit nūlykumu, aizpildit dasacejumu i nūsyutit tū da 9.septembram!,” aicynoj konkursa organizatori.

Konkursa NŪLYKUMS I DASACEJUMA ANKETA.

Seikuoka informaceja pa tuolruni 26393531 ci rokstūt iz epostu latgalisubidreiba@gmail.com.