Roksta autors: portals lakuga.lv

Pyrma kaidys šaļts plošuoku latgalīšu viereibu ar dzīsmi “Stuojīs” izapeļneja metala grupa “Varang Nord”. Daudzim par lelu puorsteigumu augusta suokumā grupa uzvarēja pasauļa leluokajā metalmuzykys konkursā “Wacken Open Air”. Portalam lakuga.lv grupa atkluoj, par kū dalinīkim ir svareigi dzīduot latgaliski, i par “Varang Nord” nuokūtnis planim.

Grupa “Varang Nord” dybynuota Daugovpilī i vysi grupys dalinīki īt nu Latgolys i dzīd latgaliski. Metalmuzykys grupa dorbojās jau nu 2014. gods, izdavuse ari albumus, tok Latgolā zynamuoka palyka itīgod piec dzīsmis latgalīšu volūdā “Stuojīs” video palaisšonys škārsteiklā juļa beiguos. Par dzīsmis “Stuojīs” viestejumu grupys menedžers Artjoms Kuricins stuosta: “Itei dzīsme ir par stypru goru, par grybysspāku, par vareibu puorvarēt sevi i īt tuoļuok. Ari par vareibu ceļtīs augšā, kod vyss, kas tev ir palics, ir spāks rūkuos i dzimtine sirdī. Dzīsmis vuordi ari stuosta par senejom kulturom, kurys mes jamam par pamatu dzīsmem.”

Grupys dalinīkim ir svareigi dzīduot latgaliski i piec jūs dūmu, dzīduošona latgaliski ir originals i rodūšs veids, kai cīneit sovu dzimtini. “Pat Latvejā smoguos muzykys izpiļdeituoju vydā nav daudz, kas dzīduotu latgaliski, i par pasauli pat nav vārts runuot. Dzīžūt latgaliski, mes izceļam sevi i nasam Latvejis i Latgolys vuordu pasaulī,” soka grupys dalinīki.

Par “Varang Nord” nuokūtnis planim Artjoms Kuricins atkluoj: “Ituo gods beiguos ci nuokušuo gods suokumā planavojam izdūt jaunu albumu “Pārķiuņa uomurs”, kas, kai ruoda nūsaukums, byus īdzīduots latgalīšu volūdā. Piec uzvarys “Wacken Open Air” planavojam vaira paceļuot i izastuot, septembrī grupai byus koncerti Baļtejis vaļstīs, oktobrī brauksim iz “Full Metal Holiday” festivalu. Planavojās vēļ ari cyti koncerti, tok vēļ gaidom apstyprynuojumus.”