Rokstu sagataveja: portals lakuga.lv

Foto konkursā “Pošu vuordim” aicynoj īsyuteit biļdis, kurys atspīgelej minoritašu, mozuoklītuotuos, pyrmīdzeivuotuoju i apdraudātuos volūdys. Teik gaideitys ari biļdis, kas dokumentej latgalīšu volūdu, latgalīšus, Latgolu i nūvoda kulturu.

Foto konkursu “Pošu vuordim” organizej Varšavys universitate (Pūleja) i tys ir vīna nu aktivitašu storptautiskuo projekta “Mozuoklītuotuos volūdys, leluos īspiejis. Sadarbeiba pietnīceibā, kūpīnu īsaisteišona i inovativi vuiceišonuos reiki – COLING” ītvorūs, kurymā pīsadola i latgalīšu volūdu puorstuov bīdreiba “Latgolys Studentu centrs”.

Biļdis var īsnēgt četruos kategorejuos:

1. Es, cylvāks. Itamā kategorejā juoīsnādz portreti. Biļdis aprokstā juodalīk informaceja par biļdē radzamū cylvāku i juo lūmu, nūzeimi vītejā kūpīnā.

2. Muns pasauļs. Biļdē juoatspīgelej kaids eipašs minoritašu, mozuoklītuotuos ci apdraudātuos volūdys vuords. Biļdē vuordu var atspīgelēt burtiskā ci puornastā nūzeimē, kai ari muokslinīciskā veidā. Biļdis aprokstā juonūruoda izvālātuo vuorda nūzeime i konteksts, kai ari saisteiba ar kūpīnu.

3. Myusu dvēselis skanis. Itamā kategorejā īsnāgtajom biļdem juoparuoda kūpīnai rakstureiguos kulturys izpausmis, pīvadumam, dzīsmis, dzeja, daņči, teatris itt. Biļdis aprokstā juosnādz zinis par biļdē radzamū aktivitati.

4. Dabiski! Īsnāgtajom biļdem itamā kategorejā ir juoparuoda attīceibys storp dobu i kulturu. Var īsnēgt biļdis, kuramuos radzama ainova, augi ci zvāri. Biļdis aprokstā juopīroksta par attāluotajom attīceibom storp dobu i kulturu, jūs nūzeimeigumu.

5. Mobilitate. Biļdem itamā kategorejā ir juoatspīgelej kulturys ci volūdys lītuotuoju puorsavītuošona telpā i laikā.

Biļdis var īsnēgt da 2019. gods 10. oktobra. Vaira par konkursu, biļžu īsniegšonys nūsacejumim i dasasaceišonu var skaiteit projekta sātys lopā.

Projektam “Mozuoklītuotuos volūdys, leluos īspiejis. Sadarbeiba pietnīceibā, kūpīnu īsaisteišona i inovativi vuiceišonuos reiki – COLING” leidza var sekuot vītnē Facebook.com.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.