Bārni izveidoj filmu “Boņuka breivdīnys”

Bārni izveidoj filmu “Boņuka breivdīnys”

Roksta autors: portals lakuga.lv

Viļānu Muzykys i muokslys školys audziekni izveiduojuši filmu latgalīšu volūdā “Boņuka breivdīnys”, kas stuosta par myusdīnu bārnu dzeivi Latgolā. Školys animacejis darbneicys dalinīki jau īprīšk veiduojuši animacejis filmys latgalīšu volūdā.

“Suokūtneji “Boņuka breivdīnys” beja īcarāts veiduot kai animacejis filmu, tok laikam īmūt, rodūšajai komandai roduos dūma puorbaudeit sovus spākus muokslys kino žanrā,” stuosta Viļānu Muzykys i muokslys školys direktore Inta Brence. Sovu pyrmizruodi “Boņuka breivdīnys” pīdzeivuoja augustā Viļānu nūvoda svātkūs. I. Brence prīcojās, ka filmu ar interesi vārušīs Viļānu jaunīši, ari školys absolventi, sajimti komplimenti i lītdereigi prīšklykumi i īsacejumi.

Par filmys “Boņuka breivdīnys” veiduošonu direktore stuosta:

“Apleik ir tik daudz steigys i nagativuo, gribējuos koč kū vīglu i gaišu. Filmys veiduošonu mes, školuotuoji, nauztveram kai dorbu, bet kai interesantu i satureigu izklaidi. Filmys golvonais aizdavums ir latgalīšu volūdā paruodeit myusdīnu bārnu dzeivi Latgolā, myusu nūvoda cylvākus, uzjiemiejus, dobu i sadzeivi. Veidojūt filmu latgaliski, mes apgiustam sovu dzymtū volūdu, i pasaklausit, cik šmuki myusu bārni prūt runuot latgaliski!”

Bārni poši filmai izveiduojuši ari subtitrus angļu volūdā.

Vīns nu leluokūs izaicynuojumu filmys veiduošonā bejs profesionala režisora tryukums, kurs paleidzātu redzēt kūpbiļdi, tok nasaverūt iz tuo, ar aizdavumu tykts golā. Filmu nu suokuma da beigu veiduojuši poši viļānīši – ostoni pīaugušī i 30 bārni i jaunīši, kuri poši radeja stuostu, filmēja i komponēja, tāluoja, īrunuoja, tulkuoja i dareja daudz kū cytu. Sovu artavu davuši školuotuoji, kuri vadeja dažaidys meistarklasis.

Īcerei tics pīsaisteits finansiejums gon projektu konkursā, gon atbaļstejuse Viļānu nūvoda pošvaļdeiba, kai ari vītejī uzjiemieji. Viļānu Muzykys i muokslys škola planavoj ari iz prīkšu veiduot filmys latgaliski.

Ar Viļānu Muzykys i muokslys školys atbolsta bīdreibys guodeibu školys audziekni jau nu 2015. gods veidoj filmys latgaliski, īprīkš topušys treis animacejis filmys. Pyrmuo filmeņa “Biteit, muna zaltspuorneite” beja veļteita Viļānu 520. jubilejam. 2016. godā viļānīši radeja animacejis filmu “Vasals, Vinnej Pūk!” kai latgalīšu apsveikumu Alana Aleksandra Milna tālam Vinnejam Pūkam 90 godu jubilejā. Sovutīs 2018. godā topa animacejis filma “Vinnejs Pūks Viļānūs” kai veļtejums Latvejis symtgadei i Viļānu piļsātys 90 godu jubilejam.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.

Print Friendly, PDF & Email

Nūtikšonu kalendars