Rokstu sagataveja: portals lakuga.lv

Hip-hopa apvīneiba “Latgalīšu Reps” publiciejuse jaunu video “Trešuo zvaigzne”. Dzīsme ir veļtejums golvonajom Latgolys vierteibom.

Par jaunū dzīsmi grupa sovā Facebook.com kontā roksta: “Itei dzīsme ir veļtejums golvonajom Latgolys vierteibom – zylajim azarim, zaļajim mežim, zalta pļovom i, prūtams, saimei, kuru veidoj myusu tivinīki – gon draugi, gon radinīki. Par tū “Latgalīšu Reps” īt klajā ar vīsmīleibys pylnu video nu Latgolys ar nalelu atsauci iz vacvacuokim, kas līk aizadūmuot par tū, cik svareigi ir saglobuot autentiskumu sev apleik i atsagrīzt dzimtinē, kab varātu nūdūt tū pareizajā formatā nuokušajai paaudzei.”

Dzīsmis autori ir Didzis Kozlovs i Ivo Grigalis. Pi video montažys struoduojs Juoņs Jēkabsons. Dzīsme daeinama Spotify, iTunes, Deezer i cytūs straumiešonys servisūs.

“Latgalīšu Reps” itūšaļt iz zynomuokī latgalīšu muziki, ari vīni nu ražeiguokūs. Apvīneibys superhitam “Žārei gaļi” vītnē Youtube.com ir jau vaira kai 1,5 miljoni skatejumu. Tik lelu skatejumu skaitu nivīnai cytai latgalīšu dzīsmei da šuo nav izadevs sasnīgt.

Napaseņ apvīneibys dalinīks Ivo Grigalis žurnalam “Ieva” intervejā atzyna: “Halturēt mes navarim atsaļaut – vysu dorom ar maksimalu energejis patiereņu. Dūmoju, ka taišni tys ir myusu panuokumu pamatā – mes muzykā sevi īguldom, bet klauseituoji tymā sevi atrūn, emocejis ir pots svareiguokais. Naasam ni školuotuoji, ni dzeivuot vuiceituoji, bet myusim ir svareigi nūdūt cytim cylvākim tuos dūmys, kurys asom saprotuši. Mes zynom, par kū sovuos dzīsmēs runojam, – myusim ir sovs dzeivis redziejums, i asam gotovi tymā daleitīs ar tim, kam dzeive vēļ veidojās. Myusim ir dzīsmis par attīceibom, par motivaceju, par ticeibu sev. I myusim ir svareigi itū viesti nūdūt latgaliski – dorom vysu, kab itū volūdu saglobuotu.”

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.