Intervejis autore: Vineta Vilcāne, portals lakuga.lv

Socialuo teikla “Instagram” lītuotuoji, īspiejams, byus pamanejuši Lauri Zalānu – atraktivu jaunīti, kura kontā nūsaverami humora pylni video i kurim sekoj tyukstūšom cylvāku. Lauri drūsai var saukt par vīnu nu Latvejis “Instagram” slaveneibu, tok juo kasdīnys nūsadorbuošona ir saisteita ar īlu sporta kusteibu “Ghetto Games”.

Tovā “Instagram” profilā īraksteits “Vienkāršs Latgalietis”. Kū tys nūzeimoj?

Asmu puiss nu lauku, nu Preiļu, bierneibā slauču gūvs, meideju sīnu i taidā gorā. Muna dūma ir taida, ka nikod navajag cytim ruodeit sevi taidu, kaids tu naesi. Ir juobyun vīnkuoršam, tys ir pats golvonais. Tū es ari mieginoju paruodeit sovā Instagram kontā.

Kū vīnkuoršs puiss nu Preļu niu dora Reigā?

Pyrms pīcim godim suoču vuiceitīs Reigā, nu suokuma īsastuoju Kulturys koledžā vuiceitīs teatra menedžmentu, tok napabeidžu. Piec tam suoku studēt žurnalistiku “Tureibā”. Studeju laikā vajadzēja atrast praksis vītu, maņ roduos īspieja izīt praksi “Ghetto Games”. Napabeidžu školu, aizguoju struoduot pylna laika dorbu “Ghetto Games”, tī ari palyku.

Kaidi ir tovi pīnuokumi “Ghetto Games”?

Maņ vaira ir rodūšs dorbs, organizeju pasuokumus, ari vodu, interveju cylvākus, veidoju smīkleigus video.

Tev “Instagram” ir teju 30 tyukstūšys sekuotuoju. 2018. godā tevi atzyna par vīnu nu Latvejis ītekmeiguokūs influenceru. Kas, tovupruot, cylvākus pīsaista tovā kontā?

Muna auditoreja ir jaunīši, tys ir symtprocenteigi. Varbyut kaids munūs video īrauga sevi, maņ ir video, kur es taisu cylvākus tipus, pīmārām, kaidi ir guliešonys veidi voi šoferu tipi. Varbyut kaidam pateik pasavērt smīkleigus video, pavadeit breivū laiku Instagram.

Ar sovim video tu mieginoj nūdūt kaidu viestejumu?

Maņ pateik smīdynuot i uzjautrynuot cylvākus i pateik, kod jī smejās. Es školā beju taids kai klasis klauns, lobā nūzeimē. Maņ Instagram ari raksteits “entertainment”, kū tulkoj kai “izklaidātuojs”.

Kur rūņ īdvesmu video?

Pamatā vysys idejis ir munys, bet kaids ari īsoka, koč kod ari pašpikoju nu cytu. Sekoju leidza tendencem.

Ar kū tev roda asociacejis vuords “latgalisks”?

Vīnnūzeimeigi tei ir latgalīšu volūda. Maņ ļūti pateik latgalīšu volūda. Es ari asmu dzierdiejs nu čyuļu, ka Latgolā ir ļūti lobsirdeigi cylvāki, pretimnuokūši. Tū es ari jiutu, maņ ari bīži soka, par kū tu tai uzatici cylvākim. Es soku, taids es asmu, vīnkuoršs latgalīts.

Ogruok, kod es Preiļūs struoduoju par jaunatnis lītu specialistu, vaira saguoja sekuot leidza latgaliskom aktivitatem. Tagad ik pa laikam koč kas uzpeļd. Muosa pastuosta, kas nūteik, ari vacuoki. Bet grybātūs zynuot vaira. Maņ vīnmār ir patics atsagrīzt sātā, es tī atgiustu energeju.

Kai tev ruodīs, voi latgalīšu volūdu byutu juovuica Latgolys školuos?

Obligati. Es dūmoju, ka tys byutu ideali. Myusim ir juosagloboj volūda, lai ari cylvāki brauc prūjom. Kas ir nu Latgolys, tim volūda ir juozyna. Es atbolstu.

Škārsteiklā atrodu, ka tova aizaraušona ir muzyka.

Maņ ļūti pateik muzyka, es gon naprūtu ni dzīduot, ni spēlēt kaidu instrumentu. Kod dzeivuoju Preiļūs, beju dīdžejs. Muzyka ir breivuo laika pavadeišona, tymā pošā laikā energejis olūts. Es ļūti īsadvasmoju nu muzykys, maņ pateik par tū stuosteit i meklēt jaunuokū muzyku.
Kaidu laiku atpakaļ gribjeju byut radejis didžejs, bet mani napajēme deļ akcenta. Nūvadeju vīnu eteru, bet piec tuo maņ pasaceja, ka dīmžāļ najims. Maņ ir mozais sapneits pastruoduot radejā.

Voi tevi aizskuore atsacejums deļ akcenta?

Iz tū momentu drusceņ aizskuore, bet tod es saprotu, ka jim mozlīt ir ari taisneiba. Informaceju tu nūdūd tikai caur bolsu, klauseituojs tevi tikai dzierd, naradz, kai tu žestikulej, naredz tovu seju. Mož jī nūsabeja, ka palaiss jaunu puisi ar akcentu i jis aizbīdēs daļu klauseituoju. Es iz jim naturu ļauna pruota, mes asam tū izrunuojuši i myusim ir lobys attīceibys.
Maņ deve īspieju trenētīs kursūs, izkūpt latvīšu volūdu, lai akcents pazustu. Es īsuoču īt, kaidys div nedelis guoju i saprotu: “Nā, maņ itū navajag, es nagrybu pazaudēt sovu identitati.”

Kas nu latgaliskuos muzykys tevi uzrunoj?

“Tuoli dzeivoj muna meiluo…” – vysys ituos ir lobys.

Tradicionaluos?

Jā, mes bīži ar draugim pasaklausom. I čyuli ari zyna itū muzyku.

Kas pateik nu modernuos muzykys?

“Latglīšu Reps”, vīnnūzeimeigi, jūs dzīsmis ir modernys. Čyulim ari pateik, atguodoju, ka “Ghetto Games” festivalā Ventspilī vysi laksteja pi “Latgalīšu Repa”.

Kas byutu juodora, kab “Ghetto Games” atteisteitu Latgolā?

Daudz kas ir atkareigs nu pošvaļdeibu. Lai veiduotu pasuokumus, skaidrys, ka ir vajadzeigs finansiejums. Ar Latgolu ir tai, kai ir. Asam bejuši Daugovpilī, Rēzeknē, Kruoslovā, Preiļūs mes uztaisejom mozu pasuokumu. Leluoku pošvaļdeibu piļsātys pat pošys īt da myusu i prosa uztaiseit pasuokumu. Ar Latgolu tai nav, mes mieginojam vysu iz pusesm daleit. Daudz kas atkareigs nu cylvāku, kas dorbojās pošvaļdeibuos. Ka jim interesej jaunīšu nuokūtnē, tod vīns nu vierzīņu byutu īt pi myusu, jo mes asam vīna nu leluokūs kusteibu Latvejā. Es ceru, ka mes brauksim bīžuok iz Latgolu.

Kaidi tev tyvuokuos nuokūtnis plani?

Es asu vaira cylvāks, kas izbauda tū, kas ir tagad. Es naasmu sev nūlics goda planu i nazynu, kū dareišu piec pusgoda. Grybu atsateisteit sferā, kur struodoju tagad, pasuokumu vadeišonā, socialūs teiklu kontu uzturiešonā, bet navar ari zynuot, cik ilgi tys vēļ byus aktuali, īspiejams, tei ir puorejūša tendence. Grybu atteisteit sovu personeibu. Maņ ļūti pateik komunikaceja ar cylvākim, taidā ziņā “Ghetto games” ir ļūti pretimnuokūšs – dūd īspiejis jaunim cylvākim.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.