Reigā byus apsaverama fotoizstuode par Latgolys cylvākim

Reigā byus apsaverama fotoizstuode par Latgolys cylvākim

Rokstu sagataveja: portals lakuga.lv

Latvejis Fotografejis muzejā nu 26. septembra byus apsaverama Ilmāra Znotiņa fotoizstuode “Latgolys ļauds”, aizvadūd ceļuojumā pa Latgolu laikā nu 1989. gods da myusu dīnu. Izstuodis atkluošona nūtiks 2. oktobrī 17.00 stuņdēs, informej muzeja puorstuove Linda Muižniece.

Izstuode “Latgales ļaudis” ir cīš personisks projekts, partū ka izstuodis autora tāvs beja nu Latgolys i bierneibā vosorys Ilmārs Znotiņš bīži pavadeja laukūs. Īrūsmi fotografēt Latgolā jis giva nu sova drauga, dāņu fotografa Stiga Stasiga, kurs, gasteidams juo tāva sātā, saceja: “Fotografej, dreiž tuo vysa pyrmatnejuo, unikaluo nabyus, mums Dānejā vaira nav.”

Pyrmī Latgolys projekta attāli radeiti 1989. godā, jaunuokī – 2018. godā. “Viertejūt foto materialu, juosecynoj, ka autora dāņu kolegys saceitais ir pīsapiļdejs. Lela daļa cylvāku foto stuostūs ir puorsacaluši iz myuža sātu, cyti – iz Angleju. Dalis sātu vaira nav, napalelūs pīmuojis lauku vītā īkūptys plašys lelsaimnīku saimisteibys. I. Znotiņa fotoprojekts ir baļsteits iz vizualu stuostu par vīnkuoršajim, sirsneigajim Latgolys cylvākim, par jūs dzeivis rytmu, kurymā svareigu vītu ījam ticeiba Dīvam i niule, i ari tod, kod bazneicā īt uzadrūsynuoja na sevkurs. Bet latgalīši guoja i vys īt. Cylvāks, Dīvs, Dorbs ir itūs ļaužu pamats, iz tuo bolstuos projekta vizualuo koncepceja,” par izstuodi soka muzeja puorstuove L. Muižniece.

Izstuodis koncepcejā paradzātys div stuosta linejis. Vīna ir fotografejis, kurys attāloj cylvāka dzeivis cyklu nūsaceita goda (pavasars, vosora, rudiņs, zīma) grīzumā, kas caurveits ar nūdarbem i tradicejom, kurys ir byutiskys i atsakuortoj godu nu goda. Ūtra lineja ir naleli, daudz personiskuoki stuosti par cylvākim, saimem, tradicejom, kas pīduovoj vareibu ceļuot laikā 30 godu grīzumā. Pīmāram, autoveikals 1992. godā, 2007. godā i 2018. godā, kuozys 1997. godā i 2017. godā, kopu svātki i c.

Ilmārs Znotiņš ir studiejs Latvejis Universitatis Žurnalistikys nūdaļā, specializiejīs Moskovys Universitatis Fotožurnalistikys nūdaļā i absolviejs vysaidus storptautyskus fotožurnalistikys kursus. 1991. godā jis beja vīns nu foto ziņu agenturys A.F.I. dybynuotuoju, bet nu 1995. da 2006. gods struoduoja gazetā “Diena” par fotoreporteri. 2006. godā I. Znotiņš suoce dorbu žurnalā “Republika.lv”, kur nūstruoduoja da žurnala sliegšonys 2007. godā. I. Znotiņš ir vīns nu fotoakcejis “Viena diena Latvijā” organizātuoju, jis ir pīsadalejs daudzuos fotoizstuodēs Latvejā i uorvaļstīs, ir vairuoku gruomotu fotografs i fotoredaktors, kai ari sajiems vysaidys bolvys fotomuokslys jūmā.

Izstuode Latvejis Fotografejis muzejā apsaverama da 3. novembra.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.

Print Friendly, PDF & Email

Nūtikšonu kalendars

Jan
26
Tre
vysu dīnu Nūvodpietnīceibys lasejumi prāve... @ Bolvu Nūvoda muzejs, tīšsaiste
Nūvodpietnīceibys lasejumi prāve... @ Bolvu Nūvoda muzejs, tīšsaiste
Jan 26 vysu dīnu
Nūvodpietnīceibys lasejumi prāvesta Alberta Budžis pīmiņai @ Bolvu Nūvoda muzejs, tīšsaiste
Gūdynojūt prāvesta Alberta Budžis (1930–1957–2017) atceri, Bolvu Centraluo biblioteka aicynoj pietnīkus pīsadaleit “Novadpētniecības lasījumos prāvesta Alberta Budžes piemiņai”. Tēmu lūks nav īrūbežuots, jis ītvar sevkuru pietnīku interesejūšu jūmu, kurys izpietis teritoreja ir Bolvu nūvods. Lasejumu[...]
Jan
28
Pīk
19:00 Gruomotys “Mīlas kastings” muzyk... @ Babeitis Kulturizgleiteibys centrs
Gruomotys “Mīlas kastings” muzyk... @ Babeitis Kulturizgleiteibys centrs
Jan 28 @ 19:00 – 21:00
Gruomotys "Mīlas kastings" muzykaluo prezentaceja @ Babeitis Kulturizgleiteibys centrs
28. janvarī 19.00 Babeitis Kulturizgleiteibys centra lelajā zalē, Piņkūs, nūtiks rakstneicys Ilzis Aizsilys gruomotys “Mīlas kastings” muzykaluo prezentaceja.   Par latgalisku nūskaņu pasaryupēs: rakstneica Ilze Aizsila i improvizators Viesturs Vizulis; muzykys grupa “Dabasu Durovys”; videjuos[...]