Uzjimta dokumentaluo filma par latgalīšim Sibirī

Uzjimta dokumentaluo filma par latgalīšim Sibirī

Roksta autors: portals lakuga.lv

Nūsasliedzs dorbs pi dokumentaluos filmys “Latgalīši Sibirī”, kas stuosta par latvīšim (latgalīšim) tuolajūs Sibira plašumūs, kuru seņči iz tīni nu Latgolys devēs peļņā, vāluok daudzi, tī dabuojuši zemi, palyka iz dzeivi. Jūs piecnuocieji vēļ ir saglobuojuši latgaliskuos tradicejis i volūdu.

Vosorys vydā fiļmiešonys grupa devēs divu nedeļu ilgā ekspedicejā iz Krīveju, Sibiri, kab tyktūs ar latgalīšim, kas tī dzeivoj jau trešajā paaudzē, zyna vēļ latgalīšu volūdu i pīkūpj latgaliskuos tradicejis. Tyka satykti ari latgalīši, kuru saimis lūcekļus nu Latvejis deportēja padūmu vara. Sastoptūs latgalīšu saimu stuosti byus radzami jaunajā dokumentajā filmā “Latgalīši Sibirī”.

Filma atkluos interesantus faktus par latgalīšu izceļuošonu i latgaliskū kulturu Sibirī, pīdzeivuotajom represejom. Filmā varēs vaira izzynuot, pīmāram, par Moskovys izdevnīceibā “Prometejs” latgaliski izdūtū Daniela Defo romanu “Robinsons Kruzo”, pabyut dzeraunē Mihailovka, kur izsyutejumā dzeivuoja i nūmira latgalīšu politiks, rakstnīks i sabīdryskais darbinīks Fraņcs Kemps. Sibirīšu i kinys veiduotuoja Arņa Slobožanina stuostus papyldynuos ekspertu komentari.

Filmys “Latgalīši Sibirī” pyrmizruode nūtik 25. septembrī 18.00 stuņdēs Daugovpilī, “Šmakovkas muzejā”, 27. septembrī filmu 18.00 i 20.00 stuņdēs ruodeis Rēzeknis Tehnologeju akademejā. Vāluok paradzāti cyti filmys seansi, goda nūgalē jū planavuots demonstrēt Latvejis Televizejā.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.

Print Friendly, PDF & Email

Nūtikšonu kalendars