Angliski runojūšūs aicynoj atkluot latgaliskū pasauli

Angliski runojūšūs aicynoj atkluot latgaliskū pasauli

Roksta autors: portals lakuga.lv

Socialūs teiklu vītnē Facebook.com angļu volūdā izveiduota lopa “Exploring the Latgalian World” (Atkluoj latgaliskū pasauli) ar mierki storptautiskā vidē popularizēt latgalīšu volūdu i latgaliskū kulturu.

Ideja par lopys izveidi rodusēs latgalīšu volūdys aktivistei i portala lakuga.lv redaktorei Vinetai Vilcānei. “Asūt kaidu laiku uorpus Latvejis i dažaidom auditorejom stuostūt par Latgolu, latgalīšu volūdu i nūvoda kulturys nūtikšonom, saprotu, ka ir gona moz materialu par Latgolu i latgalīšu volūdu angļu volūdā. Vaira ir atrūnami zynuotniski roksti, kas na vysod ir saistūši. Tok cylvākim uorpus Latvejis ir interese par Latgolu i nūvoda volūdu i jī lobu pruotu par tū vysu izzynuotu vaira. Partū ari roduos dūma izveiduot lopu angļu volūdā, kas dūtu vareibu atkluot latgaliskū pasauli,” soka idejis autore Vineta.

Jei īsadvasmuojuse nu frīzu organizejis “Afûk” Niderlaņdē, kas struodoj ar frīzu volūdu, i par sevi i frīzu montuojumu stuosta angļu volūdā, tai padorūt informaceju daīmamuoku cylvākim nu vysaidu pasauļa vītu. Piec Vinetys dūmu par latgaiskū vaira byutu juostuosta uorpus Latvejis i svešvolūduos. Jei ari cer, ka lopu pamaneis cytu mozuoklītuotūs volūdu aktivisti i pietnīki, tai veidojūt draudzeigys attīceibys ar dažaidom kūpīnom i nuokūtnē rodūt kūpeigus projektus volūdu saglobuošonai i atteisteibai.

Lopā īcarāts daleitīs ar jau asūšim resursim angļu volūdā, kas stuosta par Latgolys kulturys izpausmem, gon radeit jaunu saturu, atkluojūt interesantus faktus, vītys, nūtikšonys i paruodūt kulturys daudzveideibu i latgalīšu volūdys bogoteibu. Lopai leidza var sekuot facebook.com/LatgalianWorld.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.

Print Friendly, PDF & Email

Nūtikšonu kalendars

Sep
26
Pyr
17:00 LTG i ES. Dzeivuos sarunys. Eiro... @ Latgolys Centraluo biblioteka
LTG i ES. Dzeivuos sarunys. Eiro... @ Latgolys Centraluo biblioteka
Sep 26 @ 17:00 – 20:00
Pyrmūdiņ, 26. septembrī, “Europe Direct Dienvidlatgale” centrs, bīdreiba “LgSC” i Eiropys Savīneibys informacejis punkts Daugovpilī aicynoj iz Eiropys Volūdu dīnai veļteitu nūtykumu “LTG i ES. Dzeivuos sarunys” Daugovpilī, Latgolys Centralajā bibliotekā. Pasuocīņa laikā dzeivuos bibliotekys[...]
Sep
27
Ūtr
19:00 Latgalīšu rokstu volūdys nūdarbeiba @ tīšsaistē
Latgalīšu rokstu volūdys nūdarbeiba @ tīšsaistē
Sep 27 @ 19:00 – 20:30
Bīdreiba “LgSC” sadarbeibā ar latgalīšu kulturys ziņu portalu lakuga.lv aicynoj iz ostoņom latgalīšu rokstu volūdys tīšsaistis bezmoksys nūdarbeibom, kab kotrys interesents varātu izzynuot vaira par latgalīšu rokstu volūdu i īsavuiceit tuos pamatprincipus. Latgalīšu rokstu volūdys[...]
Oct
1
Sai
vysu dīnu Izstuode “Jura Gaigala akvareļi” @ Latgolys Kulturviesturis muzejs
Izstuode “Jura Gaigala akvareļi” @ Latgolys Kulturviesturis muzejs
Oct 1 vysu dīnu
Nu 21. septembra da 1. oktobra Latgolys Kulturviesturis muzejā apsaverama izstuode “Jura Gaigala akvareļi”. Ceļojūšuo izstuode veļteita gruomotys “Jura Gaigala varavīksne” izīšonys svātkim. Tiks izstuodeitys muokslinīka akvareļgleznys nu meitys Dacis Gaigalys kolekcejis.