Roksta autors: portals lakuga.lv

Pošā septembra izskaņā Rībeņu nūvoda Gaļānūs svineigā pasuokumā atkluoja bīdreibu “Latgolys etnogtafiskuo viestnīceiba”. Tei izveiduota ar mierki dokumentēt, saglobuot i popularizēt Latgolys nūvoda etnografiskū montuojumu.

Ideja par bīdreibys izveidi rodās pedagogei i tautystārpu darynuotuojai Ivetai Seimanovai, kurys dzymtuo puse ir Gaļāni. Bīdreibys izveide beja logisks tyrpynuojums juos suoktojam dorbam – Latgolys etnografiskuo montuojuma apzynuošonai. Pārņ Iveta izgataveja i prezentēja divejus Latgolys tārpus, kas da tuo nabeja atdarynuoti, – 19. godu symta Vydsmuižys sīvys tārpu i latgaļu sīvītis arheologiskū tārpu nu Zeimuļu kopulauka, kas datejams ar 10. godu symtu.

Bīdreibu “Latgolys etnografiskuo viestnīceiba” Iveta Seimanova dybynuojuse kūpā ar Maritu Vilciņu, kurys dzymtys saknis meklejamys Aizkaļnē. “Bīdreibu mes nūdybynuojom Reigā, tok mums beja svareigi jū atkluot Latgolā. Latgolys etnografiskais montuojums da šam, saleidzynojūt ar cytim nūvodim, ir mozuok apzynuots i ari popularizāts. Daudz materialu par Latgolu ir ari uorpus Latvejis. Caur bīdreibu gribim ceļ gaismā itū montuojumu. Juoatguodoj ari, ka etnografeja suocās kotrā sātā i var atrast koč kū nu paaudzis paaudzē montuotu,” soka Iveta.

Vīns nu bīdreibys tyvuokūs mierķu ir nuokušgod nūorganizēt nūmetni, sovukuort diveju treis godu laikā īcarāts nūorganizēt Latgolys etnografiskūs tārpu paruodi. Marita Vilciņa atzeimoj, ka bīdreibys mierkis ir na tikai apzynuot Latgolys montuojumu, tok ari izagleituot pošim dalinīkim, sasadorbuot ar etnografim i cytim jūmys specialistim.

Īsastuot bīdreibā teik aicynuots sevkurs interesents, tyvuokajā laikā planavuots bīdreibai izveiduot lopu socialajā teiklā Facebook.com, kur varēs vaira izzynuot par bīdreibys aktivitatem.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.