Izīs dzejneicys Ligijas Purinašys debeja kruojums “Sīvīte”

Izīs dzejneicys Ligijas Purinašys debeja kruojums “Sīvīte”

Rokstu sagataveja: portals lakuga.lv

Bīdreiba “Hronologeja” izdūd latgalīšu jaunuos dzejneicys Ligijis Purinašys debeja kruojumu “Sīvīte”. Dzejis kruojumā apkūpuoti vaira kai 80 teksti, kas topuši apmāram pīcu godu laikā, informej bīdreiba.

Dzejis kruojums “Sīvīte” aktualizej sīvītis seikstumu, šerpumu, dzeivis prīcu i bādys, vysu tū, kas ir juoiznas iz placu, kab atrostu laimi voi vysmoz koč kaidu īkšeju stabilitati. Autore gruomotu veļtejuse vysom styprajom sīvītem. Gon tom, kas bejušys pyrma juos, gon babu i mamys paaudzem, gon tom, kas ir sūpluok sābrūs, dorbā i draugu vydā. Pi dzejis kruojuma “Sīvīte” struoduojušys ari Ilze Sperga i Laura Melne, ilustracejis veiduojuse Ilze Gailāne.

“Sovulaik raksteišonai latgaliski mani pīvērse literats i literaturzynuotnīks Valentins Lukaševičs. Leidz tam par tekstim latgaliski nimoz i naaizadūmuoju. Īīt latgalīšu kulturys vidē deļ mane beja nazkas satraucūšs, raksteit latgaliski – absoluta uzadrūsynuošona,” stuosta Ligija.

“Latgolys sīvītei 20. godu symts beja smogs. Kari pajēme veirus i dālus, saimisteiba beja iz pošu sīvīšu smolkūs placu, vysaidys varys i laiki guoja puori. Te dzeive vysod ir bejuse drupeit cytaižuoka. Varbyut skorbuoka kai puornūvadneicom – vaira dorba bejs, bet vaira ari dvieseliskuo, spieceiguo. Ruodīs, tū ari paruoda Ligijis teksti,” soka bīdreibys “Hronologeja” vadeituojs viesturnīks Kaspars Strods.

Gruomotys attaiseišonys svātki nūtiks 25.oktobrī 16.00 stuņdēs Rēzeknē Latgolys Kulturviesturis muzejā, i 8. novembrī 18.00 stuņdēs Reigā bārā “Coco Loco”.

Sekuot leidza jaunumim par gruomotu i stuostim par Latgolys sīvītem var socialajūs teiklūs Instagram i Facebook.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.