10 interesanti fakti par grupu “Bez PVN”

10 interesanti fakti par grupu “Bez PVN”

Rokstu sagataveja: portals lakuga.lv

Iz lelkocenrtu 26. oktobrī aicynoj latgalīšu supergrupa “Bez PVN”. Gaidūt koncertu, portals lakuga.lv pīduovoj plašuokai sabidreibai nazynomus faktus par grupys pyrmsuokumim, gaitom i aizkulisem klipu fiļmiešonā.

Iz skatuvis jau 16 godus

Itūgod grupa “Bez PVN” svinēs sovys pastuoviešonys 16. dzimšonys dīnu. Grupa oficiali dybynuota 2003. gods 27. decembrī Kuorsovā. Tod nūtyka pyrmais oficialais grupys koncerts ar nūsaukumu “Bez PVN”. Tyka izpiļdeitys treis dzīsmis, nu kurūs vīna beja jau pošu sacarāta.

Klipa fiļmiešonā izmantoj eistu lidmašynu

Grupys pyrmais oficialais video beja dzīsmei “Screen”. Klipa “Screen” fiļmiešonā tyka izmontuota eista lidmašyna “An-2”. Kab nūfiļmātu kadrus nu gaisa, operators Sergejs sēdēja iz atvārtom lidmašynys durovom, pīstyprynuots ar puora “drūšeibys” trosem. 2008. godā vēļ nabeja pīejami droni, ar kū fiļmēt nu gaisa.

Nūspālātys viņ četrys ballis

Grupa “Bez PVN” sovys pastuoviešonys laikā, pošūs pyrmsuokumūs ir nūspieliejuse četrys ballis – Jaungoda i Juoņu nakts balli Kuorsovā, 9. klasis izlaidumu Varakļuonūs i korporativū pasuokumu Tomē. Piec tom grupys dalinīki sovā storpā vīnbalseigi vīnuojušīs, ka ballis vairs NIKOD naspēlēs, bet iz prīšku uzastuos viņ koncerta tipa pasuokumūs.

Naatkluoj, kū nūzeimoj nūsaukums “Bez PVN”

Ir bejušys vysaidys spekulacejis i versejis par grupys nūsaukuma “Bez PVN” abriviaturys atšifriejumu. Grupa augši nūviertej kotru nu godu garumā izvierzātūs variantu, tūmār ari iz prīšku atsasoka atkluot, kaida ir nūsaukuma patīsuo nūzeime. Grupa pasasoka Vaļsts Ījāmumu dīnestam par bezmoksys nūsaukuma reklamys īspieju iz kotra Latvejā izdrukuota pierkuma čeka.

Karteņa: publicitatis materials

Klipā īmyužynoj lelūs Latgolys plyudus

Video klips “Eņgeli sviļpoj” tyka fiļmāts slovonūs Latgolys plyudu laikā 2017. gods augustā. Klipā vairuokuos epizodēs var redzēt puorplyudušū Dubnys upi, kas izaver piec azara.

Grupys blokus projekts “Jezups i Muosys”

Grupys “Bez PVN” dalinīki apsavīnuojuši jūku projektā “Jezups i Muosys”. Tys radīs grupys “Bez PVN” miegynuojumūs i atpyutys pauzēs. Kai soka poši dalinīki – lobuokuo atpyuta nu muziciešonys ir muziciešona!

Izdūti div albumi

“Bez PVN” pyrmais studejis albums “Pyrms Vuorda…” 2006. godā tyka izdūts CD formatā. Ūtrais studejis albums “REITS” 2013. godā fiziski tyka izdūts magnetiskuos lentys formatā viņ divejūs eksemplarūs, kai ari dažūs eksemplarūs kasetēs. Tok plašuokai auditorejai beja pīejams digitali škārsteiklā.

Verūtīs “Bez PVN” klipus, ļauds pi ekranim pavadejuši ap 2 miļjonim minutu

Statistika ruoda, ka da 2019. gods oktobra grupys “Youtube” kanalā dzīsmis i video nūsavārti ap 700 000 reižu. Ļauds kūpumā, verūtīs video klipus i klausūtīs grupys dzīsmis, pi ekranim pavadiejuši ap 2 miļjonim minutu sova laika.

Klipu nūfiļmej 14 stuņdēs

Dzīsmis “Golds iz ustobys” video klipa fiļmeišona aizjēme 14 stuņdis nu vītys, naskaitūt sasagataveišonys dorbus. Pagaidom tys ir ilguokais laiks, kū grupa vīnys dīnys laikā ir pavadejuse fiļmiešonys laukumā. Gola rezultatā topa klips 3 minotu i 50 sekunžu garumā.

Īrokstus veic pošu izveiduotā studejā

Grupa “Bez PVN” puorsvorā miegīnoj, roda jaunys dzīsmis, idejis i veic īrokstus pošu izveiduotā studejā “REIGA”. Itamā studejā dorbojās i vairuokys cytys latgalīšu grupys.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.

Print Friendly, PDF & Email

Nūtikšonu kalendars

May
8
Sai
20:00 Gundegys Rancānis gleznu izstuod... @ Latgolys Kulturviesturis muzejs
Gundegys Rancānis gleznu izstuod... @ Latgolys Kulturviesturis muzejs
May 8 @ 20:00
Gundegys Rancānis gleznu izstuode "Klātesot" @ Latgolys Kulturviesturis muzejs
Nu 14. apreļa da 8. maja Latgolys Kulturviesturis muzeja lūgu vitrinuos ir īspieja apsavērt muokslineicys Gundegys Rancānis gleznu izstuodi “Klātesot”. Karteņa: rezekne.lv
May
9
Svā
12:00 Koncerts “Pasavēros saulītē” @ YouTube
Koncerts “Pasavēros saulītē” @ YouTube
May 9 @ 12:00
Koncerts "Pasavēros saulītē" @ YouTube
Sagaidūt Muotis dīnu, Kulturys i tautys muokslys centrs “Ritums” pīduovoj virtualu tautys muzykys koncertu “Pasavēros saulītē”. Nu 9. maja 12.00 stuņdem tū varēs apsavērt kulturys centra YouTube kontā ITE. Koncertprogramu taisejuši Aīda, Asnate i Aurēlija[...]
15:00 Folklorys kūpys “Saime” dzīduošo... @ Vactilžys pogosts, Bolvu nūvods
Folklorys kūpys “Saime” dzīduošo... @ Vactilžys pogosts, Bolvu nūvods
May 9 @ 15:00
Folklorys kūpys "Saime" dzīduošona pi krucifiksu @ Vactilžys pogosts, Bolvu nūvods
Maja mieness nuok ar tradicionalīm maja dzīduojumim pi krucifiksu. Bolu nūvoda Vactilžys pogostā kotru maja svātdini 15.00 stuņdēs pi krucifiksu dzīduos foklorys kūpa “Saime”. Itūņedeļ – pi Malvīnes sātys.   
20:00 Māra Čačkys izstuode “Klātienes ... @ Daugovpiļs Nūvodpietnīceibys i muokslys muzejs
Māra Čačkys izstuode “Klātienes ... @ Daugovpiļs Nūvodpietnīceibys i muokslys muzejs
May 9 @ 20:00
Māra Čačkys izstuode "Klātienes dialogi" @ Daugovpiļs Nūvodpietnīceibys i muokslys muzejs
Muokslys dīnu ītvorūs Daugovpiļs Nūvodpietnīceibys i muokslys muzejs aicynoj iz muokslinīka Māra Čačkys dorbu izstuodi “Klātienes dialogi”. Izstuode byus daīmama nu 26. apreļa da 9. maja.  Vaira par Māra Čačkys izstuodi ITE. Izstuodi varēs apsavērt[...]
May
12
Tre
14:00 Benislavys etnografiskuo ansambļ... @ Lozdukolna pogosts, Ruguoju nūvods
Benislavys etnografiskuo ansambļ... @ Lozdukolna pogosts, Ruguoju nūvods
May 12 @ 14:00
Benislavys etnografiskuo ansambļa dzīduojumi pi krucifiksu @ Lozdukolna pogosts, Ruguoju nūvods
Sekojūt maja mieneša tradicejom dzīduot pi krucifiksu, ari Benislavys etnografiskais ansamblis kotru maja trešdini 14.00 stuņdēs dzīduos pi krucifiksu.  Itūnedeļ – pi Mastarīgas krucifiksa.