Rokstu sagataveja: portals lakuga.lv

98 godu vacumā myruse muojtureibys specialiste i daudzu povuorgruomotu autore Antonina Masilūne, ziņoj raidejums “Bez Tabu”. Storp juos daudzajom povuorgruomotom ir ari pyrmuo i da šam vīneiguo recepšu gruomota latgalīšu volūdā.

Antonina Masilūne dzymyse 1921. gods 22. augustā Rēzeknē, tī ari paguoja juos bierneiba. Vāluok vuicejusēs Jaunaglyunys sīvīšu gimnazejā, studiejuse LVU Filologejis fakultatē. Struoduojuse par pavuori “Staburadzē”, restoranā Mellužūs, “Lido”, bejuse Latvejis Vaļsts Fiziskuos kulturys instituta arhivare, dorbuojusēs Latvejis Televizejis i radejisraidejumu komitejā. Paraleli dorbam vadejuse kulinarejis i muojtureibys kursus, snāguse lekcejis vysā Latvejā i ari uorpus Latvejis rūbežu, līcynoj Preiļu golvonuos bibliotekys sātyslopā daīmamuo informaceja.

A. Masilūne ir daudzu povuorgruomotu autore i leidzautore. 1992. godā izguoje juos recepšu gruomota latgalīšu volūdā “Povōru grōmota”, tei ir pyrmuo i da šam vīneiguo latgaliski izdūtuo recepšu gruomota.

Par nūpalnim 2017. godā Antonina sajēme IV škirys Treju Zvaigžņu ordini. Myužeibā A. Masilūne nūguoje 17. oktobrī. Atsavadeišona nūtiks 22. oktobrī Reigys kremacejis centra Mozajā zālē 14 stuņdēs.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.