“Žik!” – pyrmais televizejis raidejums deļ bārnu latgaliski

“Žik!” – pyrmais televizejis raidejums deļ bārnu latgaliski

Roksta autors: portals lakuga.lv

Itūrudiņ saimis ar bārnim prīcynoj Latgolys regionaluos televizejis veiduotais raidejums “Žik!”. Tys ir pyrmais televizejis raidejums latgalīšu volūdā, par kura mierķauditoreju izvālāti bārni. Idejis autore i raidejuma vadeituoja AUSMA SPRUKTE pīzeist, ka raidejuma aizdavums ir mudynuot vacuokus vaira laika pavadeit ar sovim bārnim, īraudzeit jūs talantus i paleidzēt īmīlēt Latgolu i tuos vierteibys. Ausma ari cer, ka raidejums mudynuos vacuokus vaira ar sovim bārnim runuot latgaliski.

Žurnalisti Ausmu Sprukti veiduot raidejumu deļ saimu ar bārnim mudynuojuse na viņ profesionala interese paraudzeit koč kū jaunu, tok ari personeigi īmesli: “Latgolys regionaluo televizeja jau vairuokus godus veiksmeigi pīsadola NEPLP konkursā par raidejumu izveidi latgalīšu volūdā. Ituo goda konkursā lels uzsvors beja likts iz satura veiduošonu tīši jaunīšim i bārnim. Īprīkš beju dzierdiejuse medeju specialistu vīdūkļus, ka tīši pošim mozuokajim skateituojim nav cīši lels televizejis i radejis raidejumu pīduovuojums, nimoz narunojūt par raidejumim latgaliski. Tai roduos ideja, ka raidejums saimem ar bārnim byutu tys, kas itamā šaļtī ir cīši vysim vajadzeigs i varātu liktīs interesants. Ūtrom kuortom, munai muoseicai i muna drauga muosai ir kotrai pa treis bārnim. Gastejūt pi jūs saimem pamaneju, cik tys ir skaisti, ka bārni runoj latgaliski, i tod sasagribēja ari cytus aicynuot volūdu saglobuot i nūdūt nuokušajom paaudzem. Trešom kuortuom, teiri sovteigs īmesls. Tod, kod pošai byus bārni, es cīš grybātu, kab jim i ari cytim bārnim byutu stypra pošapziņa i jī meiļuotu sovu saimi, dzymtū vītu i latgalīšu volūdu.”

Vadeit Ausmai raidejumu paleidz Rēzeknis Vaļsts pūļu gimnazejis 3. klasis škoļneica Adriana Goroščaka. Struoduot ar bārnim i veiduot raidejumu deļ pošu mozuokūs nav vīnkuorši, pīzeist Ausma, tam ir ari sovi izaicynuojumi:

“Ar bārnim ir kai ar bitem, nikod nikū navar paredzēt! Ir dīzgon gryušai likt jim gaideit i eipaši nasakustēt i napļuopuot, cikom operatori sakuortoj kamerys i mikrofonus. Fiļmiešonu laikā sasaskuorem i ar sovvaļuošonūs i ar tū, ka bārni nikod namaloj, a vacuoki piec tam sorkst i buolej. Bet kūpumā tys ir vīns lels pīdzeivuojums i prīca! Bārni īvuica prīcuotīs par seikumim i mozom dzeivis laimeitem.”

Radūšajai komandai raidejums “Žik!” klivs kai bārns i jī aicynoj navērtēt tū puoruok bargi. “Veidojūt raidejumu, poši vuicamīs. Saprūtu, ka varbyut naasam tik kvalitativi ni satura, ni tehnikys ziņā, kai leluos televizejis. Bet, cik pošai līkās, tys na vīnmār ir švaki, asam tyvuoki tautai, sovim skateituojim, i zynom, kas teišom Latgolā aktuals i, kas varātu uzrunuot cylvākus. Piec pyrmuo raidejuma sajiemu zinis socialajūs teiklūs nu draugu, rodu, paziņu i ari svešinīku, ka ir forši! Tys uzmudrynuoja, īdvasmuoja i ļuove saprast, ka asam iz pareizuo ceļa. Cerim, ka nuokušgod izadūs finansiejumu rast turpynojumam – augsim i atsateisteisim,” soka saimem ar bārnim raidejuma veiduotuoja Ausma Sprukte.

Vyss radūšais process saguodojūt ari daudz pozitivu emoceju i asūt prīca redzēt, ka ir daudz bārnu, kas runoj latgaliski: “Ka vairs nav tai kai munā bierneibā, kod aizīmu cīmā pi draugim i jūs vacuoki ar sovim bārnim runoj latvyski, a ar mani latgaliski. Dīzgon absurda sitaceja.” Ausma eipaši izceļ Rēzeknis Vaļsts pūļu ģimnazejis školuotuoju Ingūnu Zeiļu. Jei izreiz piec pyrmuo raidejuma bejuse gotova Ausmu sapazeistynuot gondreiž ar desmit saimem, kas īsadarātu puorejūs raidejumūs. Vīna nu jūs byušūt radzama carutrtajā raidejumā par sportu, a ar puorejom Ausma cer skateituojus īpazeistynuot cytu godu.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.