Kaida ir latgalisku zeimynu pīvīnuotuo vierteiba?

Kaida ir latgalisku zeimynu pīvīnuotuo vierteiba?

Roksta autore: Sandra Ūdre, portals lakuga.lv

Zeimyns, kai muoca marketinga teorejis, nav viņ uzroksts iz precis īpakuojuma ci izkuortne. Tys ir prīškstots klientu i piercieju pruotūs, kuru uzjiemiejam juosaceņš pīduovuot unikalu i jāgys pylnu. Voi itymā var paleidzēt latgaliskuo identitate? Saroksts ar latgaliskim zeimynim i uzjāmumu nūsaukumim nav nimoz cik eiss, vuords “sāta” vysaiduos kombinacejuos pasaruoda pat nazcik nūsaukumūs, puorejī – pīsatur pi originalitatis vīnā eksemplarā. Daži uzrunuotī nu vaicuojuma, kaida ir latgalisku zeimynu pīvīnuotuo vierteiba, nūsabeida, cyti – ar puorlīceibu atsasauce. Pīduovojam treju uzjāmumu latgaliskuo zeimyna radeišonys i uzturiešonys pīredzi.

Uzjiemieja Ingūna Semule (socialais uzjāmums “Puordare”):

“Maņ svareigi, lai nūsaukumā atsaspīgelej tei vīta, regions, nu kurīnis es asmu. Partū latgaliskais nūsaukumā. Ar muna uzjāmuma nūsaukuma uztveri ir dažaidi. Cylvāki nu Reigys izreiz vaicoj, kū tys nūzeimej. A Latgolā dzeivojūšī maņ puorprosa, voi tys nav saisteibā ar puoridareišonu. Jī nauzker ituo vuorda dūmu – ūtreizeja puorstruode kūpā ar latgaliskū identitati.

Tūmār maņ vysbuožuok ir bejs tai, ka cylvāki, pyrms sateik mani, jau īprīšk ir sameklejuši  informaceju, kū vuords nūzeimej, ir lasejuši muna uzjāmuma aprokstu, īsapazynuši ar vizeju. Tod jim vaira nasalīk, ka byutu kas par puoridareišonu.

Sarežgeituokais vuordā ir “uo” izruna. Nu marketinga vīdūkļa nūsaukumam juobyun vīnkuoršam, izreiz saprūtamam. Varbyut es asmu styurgalveiga taidā ziņā, ka es grybātum maineit itū attīksmi. Nu pyrmajā šaļtī nav skaidrys, kas par vuordu. Bet munā gadejumā paskaidruot, kū tys nūzeimej, i ir tei pīvīnuotuo vierteiba. Veidojās dziļuoks kontakts ar pavaicuojušū cylvāku, tys ir pat īmeslis sarunu vyspuor uzsuokt. Ka cylvāks ir pasainteresiejs, kū tys nūzeimej, munā redzīnī jam jau ir interese. I, kod es pastuostu vēļ sovu vizeju, i tei interese turpynojās, tys ir vēļ foršuok. Taitod nūsaukums ar sovu sarežgeiteibu pylda sovu funkceju – pīsaista, pajem i nūvad iz tuoļuokom darbeibom.

Tai ir, es dūmoju sovaižuok i doru pa sovam.”

Uzjiemiejs Vladimirs Vengra (autoserviss “Sāta”):

“Itei firma maņ daguoja nu drauga, jam beja tys nūsaukums taidā nūzeimē, ka pilna muoja ar santehniku, kū puordūd. Jis maņ jū pyrms 25 godim atdeve, a nūsaukums maņ cīš patyka. Nivīns nu muna servisa klientu nav sacejs, ka nūsaukums napatyktu. Tai palyka, tai struodoju. Golvonais, ka pošam pateik, tod i lītys īt.”

Uzjāmuma direktors Aleksandrs Bazilevs (kafejneica “Lizeika”):

“Myusu uzjāmumam Rēzeknē pīdar treis kafejneicys: “Restart”, “Argo” i “Lizeika”. Pādejuo atsarūn Rēzeknis nūvoda pošvaļdeibys ākā, i jai ir latgalisks nūsaukums. Ni “Karote”, ni “Ложка”. Kai nūsaukt, pīduovuojums beja nu myusu pusis, bet, tai kai asam Rēzeknis nūvoda ākā, mums beja svareigi, lai jī myus pījimtu, lai mes jūs vidē īsadarātu, partū kafejneicys nūsaukums izlamts kūpeji ar pošvaļdeibu.

Latgaliskais pasaruoda ari pīduovuojumā, pi myusu ir originala šmakovka, iedīņkartē vysmoz div iedīni ir eisti latgaliski. “Lizeika” konceptuali nūzeimej ari dreizu apkolpuošonu i saprūtameibu izvēlē, i tuos nav tikai karbonadis.

Vītejī itū vuordu saprūt i pījam, myusu logotipā ari ir izzeimāta lizeika, kotrys vīsmīļs voi bārmeņs var paskaidruot ituo vuorda nūzeimi. Da ituo ir bejuši viņ div dareišonuos atbraukuši reidzinīki, vīns nu jūs ministrs, kas nav saprotuši vuorda nūsaukumā i pavaicuojuši, kū nūzeimej “lizeika”.”

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.

Print Friendly, PDF & Email

Nūtikšonu kalendars

Nov
30
Ūtr
20:00 Izstuode “Likteņstāsti: pāri gad... @ Daugovpiļs Nūvodpietnīceibys i muokslys muzejs
Izstuode “Likteņstāsti: pāri gad... @ Daugovpiļs Nūvodpietnīceibys i muokslys muzejs
Nov 30 @ 20:00
Izstuode "Likteņstāsti: pāri gadu tālēm" 14. juņa deportaceju pīmiņai @ Daugovpiļs Nūvodpietnīceibys i muokslys muzejs
Atsacerūt 1941. goda 14. juņa deportaceju 80. godadīnu, Daugovpiļs Nūvodpietnīceibys i muokslys muzejs reikoj pīminis izstuodi “Likteņstāsti: pāri gadu tālēm”. Izstuodē varēs īsapazeit ar Daugovpiļs izsyuteitūs saimu stuostim, taipoš izstuodē varēs izzynuot vaira par Daugovpiļs[...]
Dec
1
Tre
vysu dīnu Dasasaceišona konkursam “Latgoly... @ Tīšsaistē
Dasasaceišona konkursam “Latgoly... @ Tīšsaistē
Dec 1 vysu dīnu
Dasasaceišona konkursam "Latgolys prozys skaitejumi 2021" @ Tīšsaistē
Da ituo gods 1. decembra var pīsadaleit konkursā “Latgolys prozys skaitejumi 2021” var, īsnādzūt dorbus – esejis, stuostus, romanu fragmentus (7000–12 000 zeimu apmārā) i syutūt tūs bīdreibai “LgSC” iz lgsc@lgsc.lv ar nūruodi “Latgolys prozys[...]
Dec
4
Sai
19:00 Grupys “Baltie lāči” koncertprog... @ Jelgavys Kulturys noms
Grupys “Baltie lāči” koncertprog... @ Jelgavys Kulturys noms
Dec 4 @ 19:00
Grupys “Baltie lāči” koncertprograma “Tirgus stāsti” @ Jelgavys Kulturys noms
Grupa “Baltie lāči” aicynoj iz jaunu koncertprogramu “Tirgus stāsti”. Itymā naparostajā tiergā ir vareiba saklauseit i izjust vysu, kū sirds gryb – gon dzīsmis i dzeju, gon smīklus i osorys. Ar dzīsmem i dzeju izdaiļuots,[...]
Dec
12
Svā
15:00 Konkursa “Latgolys prozys skaite...
Konkursa “Latgolys prozys skaite...
Dec 12 @ 15:00
Konkursa “Latgolys prozys skaitejumi 2021” nūslāguma pasuokums
Kab veicynuot literarū procesu Latgolā, dūdūt vareibu latgalīšu rokstu volūdā voi latvīšu literarajā volūdā rokstūšim autorim satikt leluoku auditoreju i skaiteituojim īpazeit jaunus Latgolys kulturtelpā topušus dorbus, bīdreiba “LgSC” jau ūtrū godu izsludynoj konkursu “Latgolys[...]
Dec
18
Sai
19:00 Koncerts “Celīs, bruoļ!” @ Latgolys viestnīceiba "GORS"
Koncerts “Celīs, bruoļ!” @ Latgolys viestnīceiba "GORS"
Dec 18 @ 19:00
Ituo gods 18. decembrī 19.00 stuņdēs Latgolys viestnīceibā “GORS” byus koncerts “Celīs, bruoļ!”, kurā skanēs dzīsmis nu Latgolys Kongresa 100-gadis albuma “Celīs, bruoļ!” i cytys skaneigys dzīsmis. Koncertā pīsadalēs puorstuovji nu taidom grupom kai “The[...]