Rokstu sagataveja: portals lakuga.lv

Namaterialuos kulturys montuojuma centrs “Upīte” izsludynuojs Latgolys patriotam i dzejnīkam Ontonam Slišānam (1948 – 2010) veļteitu rodūšūs dorbu konkursu. Tymā aicynoj pīsadaleit Latgolys nūvoda školu audziekņus i ari pīaugušūs.

“Dzejnīks, rakstnīks, folklorists, nūvodpietnīks i muokslinīks Ontons Slišāns ir zīmys Saulgrīžu bārns, dzims 28. decembrī, bet vuordadīnu svieteja 18. janvarī. Itys laiks Ontonam beja rodūšais laiks, kod jis sovu aktivū darbeibu veļteja Zīmeļlatgolai”, stuosta centra “Upīte” vadeituojs Andris Slišāns.

Konkursa mierkis ir aplīcynuot pīdareibu i mīleisteibu sovam dzymtajam nūvodam i styprynuot latgaliskū kulturidentitati.

Konkursa īdvesmys olūts ir Ontona Slišāna 1999. godā pīraksteitais dzejūļs.

LAIKS
Laiks māmeņas kliepam pīsačert.
Laiks tāva padūmu saprast.
Laiks ticeibai vītu atrast
I myužeibas mirkli tvert.

Laiks dzimtini īmeiļuot.
Laiks sovai tautai pīdereit.
Laiks naaizmierst īsavuiceit
Latgaļam latgaļu volūdu.

Laiks atrast laiku – mozam,
Lylam, jaunam i vacam,
Kod sevi pīruodeit pasauļam
Taidu, kaids esi…

Dorbus var īsnīgt divejuos kategorejuos – kai literaru tekstu i kai zeimiejumu. Var raksteit eseju, miniaturu, puorsoku i tt. Dorbus var īsnēgt gon latvīšu literarajā volūdā, gon latgalīšu rokstu volūdā, pareizrskateiba natiks vārtāta, atzeimoj organizatori. Zeimiejumus gaida A3 lopys formatā gleznīceibys (guaša, akvareli, eļlis kreiteni) tehnikā.

Kotrys daleibnīks var pīsadaleit obejūs konkursūs voi tikai rodūšūs dorbu, voi zeimiejumu konkursā. Kotrys daleibnīks var īsnēgt naīrūbežuotu skaitu sovu dorbu. Vysi īsnāgtī dorbi paliks Upītes muzeja fondūs. Konkursa dorbus gaida leidz 27. decembram, nūslāguma pasuokums i uzvarātuoju apbolvuošona nūtiks 2019. gods 18. janvarī Upītē. Vaira informacejis konkursa nūlykumā.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.