Ar koncertim Reigā i Rēzeknē grupa “Rikši” atkluos jaunū albumu

Ar koncertim Reigā i Rēzeknē grupa “Rikši” atkluos jaunū albumu

Rokstu sagataveja: portals lakuga.lv

Latgalīšu energiskuo postfolklorys grupa “RIKŠI” sovu jaunū albumu “trīp!” prezentēs Rēzeknē i Reigā 2020. gods janvarī. Albuma atkluošonys svātkus grupa pīsoka kai “godskuortu balleiti”, albumā byus dzieržamys Rēzeknis pusis godskuortu īražu dzīsmis grupys dalinīku aranžejuos.

Postfoklorys grupys “Rikši” jaunais albums ir ilgi lūluots i gaideits. “Kaidys tuolys Dīnvydu zemis ceļuojuma laikā manī atguoja atkluosme, ka taišni godskuortys lelā mārā veidoj latvīša mentalitati,” stuosta grupys liders Ēriks Zeps.

“Tī, Dīnvydūs, kur kotra dīna laikapstuokļu ziņā ir taida poša kai īprīkšejuo, cylvāki laika ritiejumu uztver daudz mīreiguok. Sovukuort myusim līka kaviešonuos var nūzeimēt, pīmāram, siešonys ci ražys nūvuokšonys nūkaviešonu i palikšonu bodā. Itys četrdaleigais ritiejums myusūs ir īsasieds i pasaruoda na tikai goda grīzumā. Taida, četrdaleiga, var byut ari myusu dīna ci dzeivis pūsmys.”

“Rikši” atzeist, ka jaunuos programys stuosts ir par emocejom i pīredzem, kas teik giutys dažaidu laika pūsmu pīdzeivuojumūs. Kotra emoceja i nūtikšona īkruosoj jaunu kruosu myusu dzeivis bagažys audaklā, partū albumam izvālāts nūsaukums “trīp!”. Golvonais ir dzeivis laikā pīdzeivuot kruošņu emoceju gamu, napalikt par boltu ci palāku lopu i pošim nūsaceit, kas daudz kaidys gamys teik īkruosuotys myusu pīredzē, soka grupa, aicynojūt ļautīs dzeivuot, jo pīdzeivuojumi kruosoj. Turkluot itymā stuostā cīši labi īsader ari najauši rodusēs paralele ar angļu volūdys vuordu “trip” – ceļuojums.

Albuma atkluošonys svātkūs 4. janvarī Rēzeknē Latgolys viestnīceibā GORS i 11. janvarī Reigā muzykys nomā “Daile” grupa “Rikši” aicynoj dūtīs kūpeigā ceļuojumā Rēzeknis pusis godskuortu īražu dzīsmēs, natiks aizmiersts ari par vacajom, lobajom dzīsmem. Biletis daeinamys “Biļešu paradīzes” kasēs i sistemā.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]