Rokstu sagataveja: portals lakuga.lv

Pyrmūdiņ, 11. novembrī, 12.00 stuņdēs Latgolys Kulturviesturis muzejā (Atbreivuošonys alejā 102, Rēzeknē) nūtiks Viesturis šaļteņa “Ņem, Tēvzeme, tavs esmu viss!” 9. Rēzeknes kājnieku pulkam 100”, informej muzeja Kulturviesturis nūdalis vadeituoja Anna Līpenīte.

Pyrma symts godu myusu seņčim beja tikai sapnis par breivu i naatkareigu vaļsti. Kotru godu 11. novembrī pīmynam ceineituojus, kurim nabeja šaubu par skaistū Latvejis sapni – sovu vaļsti. Jī ticēja, ka tuo deļ ir vārts ceineitīs, napasadūt, uzvarēt, zīduot vysduorguokū – dzeiveibu. Jī ticēja, ka dzeivi palykušī itū sapni nūsorguos i turēs svātā pīmiņā. Storp krytušajim i dzeivajim beja ari 9. Rēzeknis kuojinīku pulka karaveiri. Izstaiguojs Naatkareibys kara ceļus, pulks 1921.–1940. godā izavītuoja Rēzeknē.

Muzeja kruojumā globojās boguoteigs materials par pulka viesturi, ir daudz fotografeju. Sagaidūt pulka symtgadi, muzeja specialistim roduos dūma izdūt fotoalbumu. Ideja realizējuos “caur ierškim”, partū izdavuma prezentaceja nanūtyka pulka dzimšonys dīnā 9. augustā, kai beja īcarāts, bet, pasateicūt Latvejis Republikys Aizsardzeibys ministrejis finansialam atbolstam, nūtiks 11. novembrī – Luočplieša dīnys symtgadē.

Myusu vydā vēļ ir 9. Rēzeknis kuojinīku pulka radinīki i tivinīki, kurys byusim prīceigi redzēt pasuokumā, taipat gaideisim sevkuru interesentu.

Īeja iz pasuokumu breiva.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.