Latgalīšu diktats jau sastdiņ!

Latgalīšu diktats jau sastdiņ!

Roksta autors: portals lakuga.lv

9. novembrī trešū reizi varēs raksteit diktatu latgalīšu rokstu volūdā. Tys skanēs Latvejis Radejis 1 raidejumā “Kolnasāta” pl. 18:15, bet uzraksteitū tekstu varēs puorbaudeit portalā lakuga.lv. Itūgod latgalīšu diktatam izraudzeits fragments nu Egitys Kancānis stuostu gruomotys “Syltuo mola”.

Latgalīšu diktatu organizej Latgalīšu kulturys ziņu portals lakuga.lv sadarbeibā ar Latvejis Radejis Latgolys studeju. Diktata mierkis ir aktualizēt latgalīšu volūdys lītuojumu i pīvērst sabīdreibys uzmaneibu raksteitprasmei latgaliski. Koč ari īspiejis vuiceitīs latgalīšu rokstu volūdu ir stipri īrūbežuotys, tys namazynoj sabīdreibys gribiešonu komunicēt latgaliski, eipaši jaunuokuo paaudze tū izavielej kai sazinis volūdu dažaidūs socialajūs medejūs. Saskaņā ar pādejuos tautys skaiteišonys datim kasdīnā latgalīšu rokstu volūdu, kas ir viesturisks latvīšu volūdys paveids, izmontoj ap 8,8% Latvejis īdzeivuotuoju.

Trešū pasauļa diktatu latgalīšu rokstu volūdā skaiteis muzikis i grupys “Baritoni” dalinīks Mārtiņš Strods. Oktobra izskaņā jis kūpā ar diktata organzatorim gasteja divejuos Latgolys školuos –  Nautrānu vydsškolā i Baļtinovys vydsškolā, pīduovojūt īspieju vydsškolānim pīraksteit diktatu kluotīnē. Kai atzeist Mārteņš, tei beja interesanta pīredze, jo eipaši aiz tuo, ka jam pošam jau seņ bejuse vēļme īsajust školuotuoja uodā.

Diktats skanēs 9. novembrī 18:15 stuņdēs Latvejis Radejis 1. programys latgaliskajā raidejumā “Kolnasāta” (vysuos LR1 frekveņcēs i internetā vysā pasaulī). Diktatu byus īspiejams pīraksteit, ari pīsaslādzūt socialajā teiklā Facebook.com Lagolys studejis kontam. Sevkurs interesents seve pīraksteitū tekstu varēs puorbaudeit portalā lakuga.lv ci ari uzraksteitū tekstu īsyuteit eipašā tīšsaitis sistemā i sajimt atbiļdi e-postā jau ar klaidu lobuojumim. Diktata teksts sagataveits, īvārojūt 2007. godā apstyprynuotūs Latgalīšu raksteibys nūsacejumus.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.

Print Friendly, PDF & Email

Kalenders

Apr
13
Sai
all-day Osvalda Zvejsalnieka pīminis izs... @ Latgolys Kulturviesturis muzejs
Osvalda Zvejsalnieka pīminis izs... @ Latgolys Kulturviesturis muzejs
Apr 13 all-day
Izstuodē tiks eksponātys muokslinīka gleznys nu Latgolys Kulturviesturis muzeja Muokslys kolekcejis, kas puorsvorā atspīgeļoj juo agreimū rodūšū darbeibu 20. g. s. 70. godūs, kai ari 80. godu rodūšajā pylnbrīdā radeituos lelformata figuraluos kompozicejis i portretus.