Nūtiks pyrmī namaterialuo kulturas montuojuma svātki “Gūdi”

Nūtiks pyrmī namaterialuo kulturas montuojuma svātki “Gūdi”

Rokstu sagataveja: portals lakuga.lv

22. novembrī Viļakas nūvoda Škilbānu pogosta Upītē nūtiks pyrmī namaterialuo kulturas montuojuma svātki “Gūdi”, kurus, svietejūt goda jubileju Upītes kulturtelpas īkļaušonai Nacionalajā namaterialuo kulturas montuojuma sarokstā i grybūt pasceit paļdis ituos puses namaterialuos kulturas veicynuotuojim, atbaļsteituojim i leidza jutiejim, reikoj Namaterialuos kulturas montuojuma centrs “Upīte”. Svātku koncertā pīsadaleis Jānis Aišpurs, folkloras kūpa “Upīte”, grupa “Unknown Artist” i Rēzeknes nūvoda i Juoņa Ivanova Rēzeknes muzykas vydsškolas pyutieju orkestris, bet koncertu vadeis Māris Susejs.

Upītes kulturtelpa, kas taišni pyrma goda tyka īkļauta Nacionalajā namaterialuo kulturas montuojuma sarokstā, ir daļa nu viesturyskuo Abrenes apriņča i unikala ar saglobuotū i dzeivū Zīmeļlatgolas latvīšu (latgalīšu) kulturas montuojumu, tradicejom i volūdu. Upītes kulturtelpas suokums – 20. gs. 30. godi, bet 40.–50. godūs, izaveidojūt kolhozim, tyka radeits pamats Upītes cīmam, kas atsarūn centrā vacajai kulturtelpai, kū veidoj lelī cīmi. Upīte ir pazeistoma gon ar Zīmeļlatgolai rakstureigū folkloras montuojuma globuošonu i aktivu populariziešonu, tei sovulaik beja dzejnīka i nūvodpietnīka Ontona Slišāna darbeibas vīta, kai ari myusu dīnuos Upīte ir vīna nu aktivuokūs latgaliskūs nūtikšonu vītu Latvejā, reikojūt kai vacuokū latgalīšu dzejas i muzykas festivalu “Upītes Uobeļduorzs”, folkloras festivalu “Lipa kust” i cytas nūtikšonas.

Kab gūdynuotu ituos kulturtelpas kūpiejus, veicynuotuojus, atbaļsteituojus i leidza jutiejus, pyrmū reizi Viļakas nūvoda Upītē teik reikuoti lelī svātki “Gūdi”, kurūs vēļ nabejušā veidā sasaveis tradicionalais ar myusdīneigū gon mutvuordu i amatnīceibas, gon kulinarajā Upītes kulturtelpas montuojumā. Svātku koncertā 22. novembrī 19.00 pīsadaleis grupas “The Sound Poets” solists Jānis Aišpurs, folkloras kūpa “Upīte”, grupa “Unknown Artist” i Rēzeknes nūvoda i Juoņa Ivanova Rēzeknes muzykas vydsškolas pyutieju orkestris, bet koncertu vadeis Māris Susejs. Piec koncerta svineiguos daļas byus balle i daņči ar grupu “Celinieki”.

Namaterialuos kulturas montuoja centra “Upīte” direktors Andris Slišāns par svātku “Gūdi” idejas rosšonūs soka:

“Ideja par ituodim svātkim roduos jau seņ, tik nazkai nasaguoja pīpiļdiet, bet itūgod ir tys eistīs gods i eistuo dīna! Jubileja vīnam godam Namaterialuo kulturas montuojuma sarokstā ir lobs laiks, kab izlyktu punktu iz “i” tam, kas jau padariets, i suoktu jaunus i ambiciozus projektus. Gribīs tuodūs svātkūs pasciet paļdis vusim, kuri veicynoj, atbolsta i jiut leidza Upītes puses kulturai.”

Upītē dorbuošonuos, ceļūt gūdā taišni namaterialū kulturas montuojumu, turpynuosīs vēļ i vēļ, kū aplīcynoj ari itūgod nūslāgtais bīdreibas “Upītes jauniešu folkloras kopa” i Latvejas Nacionaluo kulturas centra leigums par sadarbeibu projektā “Kulturas tradiceju saglobuošona i populariziešona i storpkulturu dialoga veicynuošonas pasuokumu organiziešona Latgolas regionā”, kai ari apsajimšona dūt jaunu dzeivi i virzeibu pārn slāgtuos Upītes pamatškolas telpom.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.

Kalenders

Jun
19
Cat
06:45 Pasuokums “FIZISKAIS RŪBEŽS: kul...
Pasuokums “FIZISKAIS RŪBEŽS: kul...
Jun 19 @ 06:45 – 18:45
Pasuokums "FIZISKAIS RŪBEŽS: kulturys nūzeime i pīejameiba Latvejis austrumu regionā"
Latgolys muokslys i kulturys platforma MUD LAB aicynoj iz storpdisciplinaru pasuokumu FIZISKAIS RŪBEŽS, kas nūtiks Leivuonā ituo gods 19. junī, daudzfunkcionaluo jaunīšu iniciativu centra “Kvartāls” futbola laukumā i Leivuon dzeļžaceļa stacejā. Pasuokums, kurā pīsadaleis kai[...]
18:00 Seminars “Viesturis olūtu komple... @ Kruoslovys nūvoda muzejs
Seminars “Viesturis olūtu komple... @ Kruoslovys nūvoda muzejs
Jun 19 @ 18:00
Seminars "Viesturis olūtu kompleksuo izpiete: mutvuordu viesturis olūti i fotografejis" @ Kruoslovys nūvoda muzejs
19. junī 18.00 stuņdēs Kruoslovys nūvoda muzejā nūtiks seminars “Viesturis olūtu kompleksuo izpiete: mutvuordu viesturis olūti i fotografejis”.
18:30 Izruode “Melnais piens/2024” @ Jaunais Reigys teatris
Izruode “Melnais piens/2024” @ Jaunais Reigys teatris
Jun 19 @ 18:30 – 20:15
Paguojuši 15 godi, kai JRT roduos izruode “Melnais piens”. Itei izruode paruoda, ka teatram nav obligati vysod juobyut baļsteitam iz destrukceju i konfliktim. Tys var byut ari par harmoneju i skaistumu, koč i skumeigu. Vizuali[...]