Literari muzykaluo Andrejdīna Lūznovā

Literari muzykaluo Andrejdīna Lūznovā

Rokstu sagataveja: portals lakuga.lv

Sastdiņ, 30. novembrī, iz tradicionalū sasatikšonu Andrejūs aicynoj literari muzykaluo nūtikšona “Andrejdīna” Lūznovys muižā, līcynoj muižys sātys lopā publicātuo informaceja.

Ituo goda “Andrejdīna” reizē byus ari Lūznovys muižys nūtikšonu cykla “Literārās sarunas Lūznavas muižā” nūslāguma sasatikšona, izvaicojūt literati Ilzi Spergu. Taipat kūpā sabrauks tī, kurī roksta, pasauli i sevi maklādami tekstūs. Naiztryukstūši byus ari muzyka, naiztiks bez klauseituoju leidzdarbeibys i Lūznovys muižys šarma, sūlej pasuokuma organizatori.

Ilze Sperga ir pazeistama ar sovim tekstim i daudzim sabīdryskim projektim. Gruomotu skaiteituoju mīlesteibu izapeļnejuse ar prozys kruojumu “Dzeiveibai” (2014). Tys ir smeļdzeigs, volūdys i styla ziņā gords i latgaliskumā dziļš, tematiski Latgolys kasdīnu caur sirdi i emocejom izlaists gobols. Stuostu varūni i bārni, jaunīši, kas dzeivoj myus apleik. Partū ari suope ir osa i osora patīsa.

Vokora gaitā taipat literari kluotyn byus i sovus spylgtuokūs rudiņa tekstus skaiteis Anna Rancāne, Līvija Liepdruviete, Ineta Atpile-Jugane, Ligija Purinaša, Sandra Ūdre, Meldra Gailāne, Karonhisake, Līga Rundāne, Līga Čevere, Jurs Viļums, Inga Kaļva-Minina, Betija Berga i Jana Skrivļa-Čevere. Kai vysod Andrejdīnys mikrofons ir daīmams sevkuram, kurs gryb i kuram ir, kū pasceit pasauļam. Sovu sokomū muzykā ruodeis bārnu rokgrupa “Žvūrgzdyni”, var cerēt, ka gitara pasaruodeis rūkā ari Guntim Rasimam, kurs ir “Žvūrgzdynu” vadeituojs, i Arņam Slobožaņinam.

Literaturzynuotneica i “Andrejdīnys” reikuotuoja daudzu godu garumā Ilga Šuplinska soka:

““Andrejdīnys” tradiceja pasaruodeja pyrma 20 godu, vaicojūt sovejūs goda tymsuokajā laikā. Kūpā puordzeivuots i izjusts daudzi, kotrā reizē ir koč kas taids, kas naatsakuortoj nivīnā īprīškejā reizē. Tok ailinīki i dzīsminīki ir ituo pasuokuma pamats. Tys roda energetiski lobu tyvyma i spāka sajiutu.”

Sarunu ciklys “Literārās sarunas Lūznavas muižā” Lūznovys mūžā nūteik jau vairuokus godus, aicynojūt skaiteituojus atkluot, cik dažaida ir jaunuokuo literatura, i pīduovojūt īpasazeit ar dažaidim autorim. Itūgod pavasarī varēja sasatikt ar dzejneicu Ivetu Ratinīku, vosorys suokā īpasazeit ar dzejnīku i tulkuotuoju Kārli Vērdiņu, tikū rudinī bārnus muokslys detektivspēlē aizruove Luīze Pastore, bet sova sarunu reize bejuse ari Annys Rancānis, Ingys Ābelis, Andrys Manfeldis i cytu autoru īpazeišonai. Literari muzykaluos “Andrejdīnys” “sāta” Lūznovys muiža byus jau ūtrū reizi,.

Īīšona pasuokumā ir bezmoksys, gostūs iz sasatikšonu pi čaja i rudiņa dūmu aicynuots kotrys grybātuojs.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.

Print Friendly, PDF & Email

Nūtikšonu kalendars

May
25
Tre
16:00 Maja dzīduojumi pi krysta ar etn... @ Vabalis krysts
Maja dzīduojumi pi krysta ar etn... @ Vabalis krysts
May 25 @ 16:00 – 17:30
Majs katuoļu bazneicys kalendarā ir Svātuos Jaunovys Marijis mieness – laiks, kod Vabalē teik izpuškuoti ceļa molys krysti i nūteik maja dzīduojumi. Ari itūgod, saglobojūt vīnu nu namaterialuo kulturys montuojuma tradiceju, pogosta ļauds teik aicynuoti[...]
May
26
Cat
19:00 Daņču vokors ar folklorys kūpu “... @ Augšdaugovys nūvoda kulturys centrs "Vārpa"
Daņču vokors ar folklorys kūpu “... @ Augšdaugovys nūvoda kulturys centrs "Vārpa"
May 26 @ 19:00 – 21:00
Daņču vokors ar folklorys kūpu "Dyrbyni" @ Augšdaugovys nūvoda kulturys centrs "Vārpa"
Leidza: ārtys mainis kurpis doncuošonai, dzeramais iudiņs. Daleiba breiva.
May
27
Pīk
15:00 Diskuseja par Latgolys parka att... @ Reiga
Diskuseja par Latgolys parka att... @ Reiga
May 27 @ 15:00 – 17:30
Diskuseja par Latgolys parka atteisteibu @ Reiga
Reigys dūme piec latgalīšu navaļstiskūs organizaceju rūsynuojuma lāmuse Moskovys duorzu Reigā puorsaukt par Latgolys parku. Kab dūmuotu, kai reizē ar itom puormaiņom parku padareit par pīviļceiguoku teritoreju i īspieju reidzuonim car tū vaira izzynuot par[...]
16:00 Storptautyskuo Latgolys grafikys... @ Daugovpiļs Marka Rotko muokslys centrs
Storptautyskuo Latgolys grafikys... @ Daugovpiļs Marka Rotko muokslys centrs
May 27 @ 16:00 – 17:30
Simpozeju producej bīdreiba SIVIA, i jau ostoitū reizi tys nūteik kai daļa nu Daugovpiļs Marka Rotko muokslys centra simpozeju programys. Tys turpynoj grafikys muokslys medeja īdzeivynuošonu Daugovpilī i Latgolys vuorda nesšonu storptautyskai car grafiku aktivitatem[...]
20:00 Jura Ostrovska koncerts @ Tiļžys kulturys i viesturis noms
Jura Ostrovska koncerts @ Tiļžys kulturys i viesturis noms
May 27 @ 20:00 – 22:00
Jura Ostrovska koncerts @ Tiļžys kulturys i viesturis noms