Rokstu sagataveja: portals lakuga.lv

Ūtardiņ, 10. decembrī, 14.00 stuņdēs Latgolys Kulturviesturis muzejā Rēzeknē nūtiks Viesturis šalteņu pītura “Pieminot bīskapu Jāzepu Rancānu”, informej muzeja specialists kulturviesturis vaicuojumūs Kaspars Strods.

Latgola var lapuotīs ar daudzom izcylom personeibom, kuru dorbs ir sekmiejs na viņ Latgolys regiona, bet ari vysys Latvejis vaļsts atteisteibu, tūstorp uorpus juos geografiskūs rūbežu. Jūs vydā ir ari latgalīts nu Zaļmuižys pogosta – veiskups Jezups Rancāns (1886–1969).

Itūmienes aprit 50 godi nu J. Rancāna aizīšonys myužeibā, partū decembra Viesturis šalteņu pīturā Latgolys Kulturviesturis muzejs aicynoj īsapazeit ar goreidznīka, politika i sabīdryskuo darbinīka dzeivis leiklūčim – nu studeju godu Pīterpilī i Latvejis vaļsts izveidis da pat dzeivei uorpus sovys dzimtinis rūbežu – Vuocejā i Amerikys Savīnuotajuos Vaļstīs. Pasuokuma laikā varēs nūsavērt 1996. godā režisora Romualda Pipara uzjimtū dokumentalū filmu “Jāzeps Rancāns. Baltais bīskaps ar rudzupuķi”, kurā īmyužynuotys pazeistamuo nūvadnīka dzeivis gaitys.

Ituogods majā Reigys dūmis deputati atbaļsteja lāmumprojektu Jezupa Rancāna vordu pīškiert īlai bez nūsaukuma Kengarogā. Veiskupa J. Rancāna nūpalni Latvejis vaļstiskuma veiduošonā saistuos i ar 1917. gods Latgolys kongresu, i diplomatiskū dorbu Latvejis vaļsts pastuoviešonys pyrmajūs godūs, veidojūt lobvieleigu Rūmys pāvesta attīksmi, i dorbu Saeimā, suocūt nu 2. Saeimys leidz pat 4. Saeimys darbeibys puortraukšonai, parlamenta prīšksādātuoja bīdra omotā, trymdā Latvejis politiskūs parteju lideri jū pīzyna par Latvejis Vaļsts prezidenta vītys izpiļdeituoju. Rēzeknē laukums piļskolna pakuojē J. Rancāna vuordā nūsaukts jau 2003. godā, bet tī uzcaltajom ākom (“Zeimuļs”) adrese ir Krosta īla. Partū par taida laukuma nūsaukumu zyna ratais.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.