“Latgalīšu Reps” aicynoj iz vierīneigu solo koncertu

“Latgalīšu Reps” aicynoj iz vierīneigu solo koncertu

Rokstu sagataveja: portals lakuga.lv

Latgalīšu supergrupa, hip-hopa apvīneiba “Latgalīšu Reps” sovus fanus aicynoj iz vierīneigu solo koncertu “Cyta dzela” Rēzeknē nuokušuo gods martā.

Grupys pyrmais solo koncerts “Cyta dzela” nūtiks 21. martā Latgolys viestnīceibā GORS. Koncertā byus dzieržamys na tikai nu jau vysim labi zynomuos dzīsmis, bet ari dzīsmis nu jaunuo albuma “Cyta dzela”. Tū “Latgalīšu Reps” planavoj izlaist 2020. gods pavasarī. Koncertā grupa sūlej ari puorsteigumus i eipašūs gostus.

“Īmam sūli augšuok lobuokā kvalitatē i izpiļdejumā. Nikod nazinim, kas myus dzeivē sagaida, bet cikom nu gaisa nakreit akmini, dzeivē vyss ir kuorteibā, īmam iz prīkšu, nasaverūt iz tū, ci myusim ir pasaveics, ci nā. Laime ir pats golvonais. Dori nu vysys sirds. Nūtici sev. Nūtici sapynam. Dzeive naapsastuoj,” saceits grupys paziņuojumā par koncertu.

Grupys “Latgalīšu Reps” uzvarys guojīņs aizasuoce 2017. godā, tai bejuši vairuoki veiksmeigi hiti – “Skots pa lūgu”, “Es tycu”, “Atver durovys”, “Kūdra deg”, “Trešuo zvaigzne”, bet da šam popularuokajai dzīsmei “Žārei gaļi” nu pyrmuo solo albuma vītnē “YouTube” ir jau 1,8 miljoni skatejumu. Apvīneiba sajāmuse ari Latgalīšu kulturys goda bolvu “Boņuks” par veikumu 2017. i 2018. godā. Radejis “Pieci.lv” 2018. gods 7. septembra raidejumā grupa tyka TOP pyrmajā vītā ar dzīsmi “Žārei gaļi”. Muziki īgivuši atzineibu nu vaļsts prezidenta Egīla Levita i tyka uzaicynuoti uzastuot juo inauguracejis sareikuojumā.

“Latgalīšu Reps” 2019. gods vosorys sezonā ir uzastuojušs taidūs pasuokumūs kai “Summer Sound”, “Ghetto Games” festivalā Ventspilī, festivalā “OGLE”, Ozola jubileja koncertā Siguldā i c.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.

Print Friendly, PDF & Email

Nūtikšonu kalendars