Izveiduotys aplikacejis “WhatsApp” uzleimis latgalīšu volūdā

Izveiduotys aplikacejis “WhatsApp” uzleimis latgalīšu volūdā

Roksta autors: portals lakuga.lv

Mobilūs telefonu aplikacejis “WhatsApp” lītuotuojim ir vareiba palikt latgaliskuokim, kasdīnys saziņā ar draugim, rodim i kolegom izmontojūt speciali izveiduotuos uzleimis (stickers) latgalīšu volūdā. Tuos radejs “Latgalīšu kulturys ziņu portals lakuga.lv” ar ASV dzeivojūšuo latgalīša, filantropa Pītera Aloiza Ragauša finansialu atbolstu.

Speciali izveiduotuos uzleimis aplikacejai “WhatsApp” ītver kasdīnā i ari eipašuokuos dzeivis šaļteņuos lītuotys frazis latgalīšu volūdā, kai pīmāram, “Vasals!”, “Daudz laimis dzimšonys dīnā!”, “Es tevi mīļoju”, “Laimeigu Jaunū godu!”, “Nui!”, “Šmuki!”, “Lobs reits!” i c. Kūpumā radeitys 22 uzleimis ar latgaliskim tekstim. Aplikaceja “Latgalian stickers”/ “Latgalīšu uzleimis” papyldynuota ar četrim Latvejā lītuotim karūgim – Latvejis, Latgolys, līvu i Sielejis karūgu.

Uzleimu izveidē latgalīšu portals lakuga.lv sasadorbuoja ar dizaineri Inesi Krivmani i programātuoju Juoni Rancānu. Tūs izveidi finansiali atbaļsteja ASV dzeivojūšais latgalīts, uzjiemiejs i Latvejis gūda konsuls Teksasys štatā Pīters Aloizs Ragaušs.

“Mes gribējom latgalīšu volūdu paruodeit atraktivā i modernā veidā, jo eipaši uzrunuot jaunīšus. Latgalīšu volūda digitalajuos tehnologejuos veicynoj juos lītuošonu. Lītuotne “WhatsApp” paleidz dažaiduos pasauļa vītuos dzeivojūšajim latgalīšim uzturēt kontaktus. Munupruot, tys ir breineigi, ka itū saziņu vēļ interesantuoku padareis uzleimis latgalīšu volūdā,”soka P. Aloizs Ragaušs.

Aplikaceja “Latgalian stickers”/ “Latgalīšu uzleimis” bezmoksys itūšalt pīejama Android operātuojsistemu mobilūs īreiču lītuotuojim, sovukuort Apple iOS operātuojsistemys lītuotuojim uzleimis byus pīejamys 2020. godā. Cikom iPhone lītuotuoji “WhatsApp” sajimtuos latgalīšu uzleimis nu Android sistemu lītuotuoju var saglobuot kai “Favorīti/Favourite” (juoizspīž iz uzleimis i juosekoj tuoļuok nūruodeitojim darbeibom) i izmontuot syuteišonai.

Aplikaceja Android lītuotuojim pīejama: https://play.google.com/store/apps/details?id=com.ltg.stickers

“Latgalīšu kulturys ziņu portals lakuga.lv” ir pasaulē vīneigais tikai latgalīšu rokstu volūdā saturu rodūšs medejs. Tymā var skaiteit par Latgolys i latgaliskuos kulturys aktualitatem, intervejis ar sabīdreibā zynomim cylvākim, kai ari atrast vierteigus materialus latgalīšu volūdys raksteitprasmis uzlobuošonai. Portalu lakuga.lv uztur bīdreiba “Latgolys Studentu centrs”.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.

Print Friendly, PDF & Email

Nūtikšonu kalendars

Oct
5
Tre
15:00 Pītera Korsaka fotografeju izstu... @ Latgolys Kulturviesturis muzejs
Pītera Korsaka fotografeju izstu... @ Latgolys Kulturviesturis muzejs
Oct 5 @ 15:00 – 16:30
Izstuode viestej par 20. i 21. godu symtā satyktajim zynomajim i mozuok zynomajim latgalīšim. Tei ir līceiba par laikabīdrim mynātajā periodā, kurūs vydā ir Pīters Zeile, Evalds Vasilevskis, Bronislava Martuževa, Juoņs Streičs, Bronislavs Spridzāns i[...]