Filmys “Piļsāta pi upis” pyrmizruode byus Kruoslovā

Filmys “Piļsāta pi upis” pyrmizruode byus Kruoslovā

Rokstu sagataveja: portals lakuga.lv

Režisora Vīstura Kairiša jaunuokuos filmys “Piļsāta pi upis” pyrmizruode nūtiks 2020. gods 11. janvarī Kruoslovā i 15. janvarī Reigā. Jau nu šudiņdīnys var nūpierkt beletus uz filmys seansim.

Vēļ paguojušajā nedeļā studejā Prāgā nūtyka pādejī dorbi pi filmys skanis i attāla, bet itūšaļt piļneibā ir pabeigts treis godu ilgais filmys “Piļsāta pi upis” tapšonys process, i filma ir gotova izruodeišonai Latvejis kinoteatrūs nu nuokušuo gods janvara vyds.

Filma veiduota latgalīšu volūdā, i juos pamatā ir attīceibu stuosts, meilys treisstyurs, iz paguojušuo godu symta 30.–40. godu viesturiskūs nūtykumu puormaiņu fona. Dailmaļavuotuoja Aņša īcarātuo ir ebreju meitine Zisla, tok mārgys tāvs līk jūs mīlesteibai škieršļus. Saīt tai, ka itymā laikā Aņša dzeivē pasaruoda šmukuo latvīte Naida. Storp treis varom, kas sabrodoj Aņša piļsātu, divom sīvītem, kurys plūsa juo sirdi, īspiejama tikai vīna izvēle.

Filmā byus dzieržamys vairuokys volūdys: latvīšu, tymā skaitā latgalīšu, krīvu, vuocu, jidišs, jo volūdu mikslis beja dabiska paruodeiba laikā, kod multikulturalā vidē cīši sūpluok dzeivuoja dažaidu tauteibu cylvāki i eisā pūsmā nūsamaineja vairuokys varys. Pamatā filmys varūni runuos latgaliski, itim tekstim filmā paradzāti titri latvīšu literarajā volūdā.
Vairums filmys ainu uzjimtys Latgolā – Kruoslovā, Ludzā, Rēzeknē, Varakļuonūs, Daugovpilī i Subatē. Lela nūzeime filmā ir Latgolys dobys ainovai, eipaši upei – ari tymā atsaspīgelej gon mīra, gon kara laiki.

“Filmys pyrmizruode nūtiks 11. janvarī Kruoslovā, i tys ir logiski, jo ar itū nūtykumu mes gribim izruodeit pateiceibu gon kruoslavīšim, gon cytim latgalīšim par lelū paleidzeibu filmys tapšonā,” soka filmys producents Guntis Trekteris.

Nu Latgolys īt filmys golvonuo varūņa Aņša lūmys akters Dāvis Suharevskis, itei ir juo pyrmuo lūma. Puorejuos lūmuos akteri: Agnese Cīrule, Gundars Āboliņš, lītuvīšu kino legenda Jozs Budraitis i čehu aktrise Brigita Cmuntova.

Vīsturs Kairišs filmu veidoj kūpā ar sovim ilggadejim radūšajim partnerim – muokslineicu Ievu Jurjāni i operatoru Gintu Bērziņu. Studejā “Ego Media” producātū filmu finansej Nacionalais kino centrs, ari Leitovys i Čehejis kino institucejis.

Beletus iz filmys seansim var nūpierkt pilsetapieupes.lv

Vaira par filmu skaiti:

Agnese Cīrule: vīns nu izaicynuojumu beja filmā runuot latgaliski

Saruna ar kinys “Piļsāta pi upis” golvonū akteri Dāvi Suharevski

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.