Interesanti fakti par grupu “Rikši”
Rokstu sagataveja: portals lakuga.lv
Postfolklorys grupa “Rikši” svieteis jaunuo albuma “trīp!” attaiseišonys svātkus, aicynojūt iz koncertim 4. janvarī Rēzeknē i 11. janvarī Reigā. Albumā byus dzieržamys Rēzeknis pusis godskuortu īražu dzīsmis grupys dalinīku aranžejuos. Portals lakuga.lv atkluoj da šam mozuok zynomus faktus par “Rikšim”.
Vysi albumi izguojuši janvarī
Jaunais albums “trīp!” byus “Rikšu” trešais albums, tys taipoš kai īprīkšejī divi “Pa pyrmam” (2014) i “Sieju sovu” (2016) sovus attaiseišonys svātkus pīdzeivuos janvarī. Itys zīmys mieness grupai ir eipašs, jo 2011. gods 14. janvars teik skaiteits par grupys dzimšonys dīnu. Pyrmais oficialais koncerts nūtyka 2011. gods 26. martā Reigā folkklubā “Ala pagrabs”.
Sasateik “Vīterūs” i izveidoj sovu grupu
Vysi grupys dalinīki sasatyka Rēzeknis bārnu i jaunīšu folklorys draugu kūpā “Vīteri”. Grupa “Rikši” roduos, kod leluokuo daļa tuolaika “Vīteru” sastuova aizbrauca studēt iz Reigu, bet jaunīšim gribējuos kūpā pavadeit laiku muzykalā gaisūtnē. Grupys pyrmsuokumūs dalinīki sovā storpā sasarunuoja latvīšu literārajā volūdā, bet nu jau lobu laiku grupys sazinis volūda ir latgalīšu.
Grupys dalinīku videjais vacums ir 25,4 godi
Postfolklorys grupā “Rikši” dorbojās pīci jaunīši – Ēriks Zeps, Madara Broliša, Ivars Utāns, Mārcis Lipskis i Jurģis Lipskis. Izaruoda, ka dalinīku videjais vacums ir 25,4 godi. Grupas puorstuovi smej, ka “Rikšūs” dalinīku maiņa nūteikūt, kab saglobuotu jaunekleigu videjū vacumu.
Vystuoluokais koncerts ASV
“Rikši” ir pazeistami na tikai Latvejā, grupa ir uzastuojuse dažaidūs latvīšu pasuokumūs Krīvejā, Zvīdrejā, Norvegejā, Francejā, Vuocejā i Luksemburgā, bet vystuoluokais braucīņs grupai ir bejs iz Milvoki ASV.
2020. gods dzīšmu i deju svātkūs skanēs “Rikšu” dzīsme
Vairuokys “Rikšu” dzīsmis ir izmontuotys par pamatu tautys deju horeografejom. 2020. gods Latvejis školu jaunatnis dzīšmu i deju svātkūs tiks dejuots “Začeits” (dzīsme “Cylpu, cylpu”) feimanīša Gunta Tjarves horeografejā, bet dzīsme “Aiz upeitis” patīseibā ir radeita speciali horeografis Dainys Kjakstis diplomeksamenam.
