Filmys “Piļsāta pi upis” akters Gundars Āboliņš šudiņ sviņ dzimšonys dīnu

Filmys “Piļsāta pi upis” akters Gundars Āboliņš šudiņ sviņ dzimšonys dīnu

Rokstu sagataveja: portals lakuga.lv

Janvara vydā iz Latvejis kinoteatru ekranim izīs režisora Vīstura Kairiša jaunuokuo spēļfilma “Piļsāta pi upis”. Vīnu nu golvonūs lūmu — ebreju tierguotuoju Bernšteinu — filmā spēlej akters Gundars Āboliņš. 7. janvara jubilaram itei ir jaunuokuo kino lūma.

Par lūmu, aktera izvēli i rezultatu stuosta filmys režisors V. Kairišs: “Lūma beja taids vacs tragisks ebrejs — myužeigais žyds. Dūmojūt, kurs varātu itū skorbū tālu īmīsuot, guoja pruotā vysaidi tradicionaluoki rysynuojumi, beju Viļņā i provieju ari Regimantu Adomaiti. Tok suoku atteisteit kastingu natradicionaluokā vierzīnī i īcerieju dreizuok taidu dzeivis gudra komedianta tālu. Jā, koč kai redziejuos, ka Gundaram byutu lels izaicynuojums nūspēlēt Bernšteinu. Niule radzu, Bernšteina tāls ir izaveiduojīs izcyls. Vajadzeigais dzeivisgudrais filmys bolsts. Spūdrs Gundara dorbs.”

G. Āboliņa varūņs Bernšteins ir simpatiskuos Ziselis tāvs. Boguots ebreju tierguotuojs, kuram komunisti atjam eipašumus i naudu, bet nacisti — dzeiveibu. Koč ari Bernšteins līk škieršļus filmys golvonuo varūņa Anša draudzeibai ar sovu meitu, itys cylvāks ar laiku palīk Anšam tyvs. Ļaunūt Anšam sevi gleznuot, jis ļaun sovā sejā īraudzeit vaira na tikai nacionalu koloritu, bet vyspuorciļvieciskū. Cylvāku. Jis paleidz Anšam radeit eistu muokslys dorbu.

Anšam ar Bernšteinu filmā ir daudz kūpeigu epizožu. Golvonuos lūmys Anša atveiduotuojs Dāvis Suharevskis, kuram itei beja pyrmuo filmiešonuos pīredze: “Jis ir eists profesionaļs, var nūspēlēt vysu. Cikom muns Ansis vēļ dūmoj, kū dareit, kai spēlēt, Āboliņa Bernšteins treis reizis ir īguojs i izguojs nu lūmys.”

Karteņa: A. Zeltiņa

Naigys lūmys atveiduotuojis filmā aktrise Agnese Cīrule par sadarbeibu ar Gundaru Āboliņu: “Mums nabeja daudz epizožu, kuruos vīnā kadrā ir muna varūne Naiga i Bernšteins, tok maņ filmiešonuos beja vareiba G. Āboliņu īpazeit sarunuos nu dorba breivuos šaļtīs. Jis ir cīš aizrauteigs sarunu bīdris, kas iz jaunuoku kolegu verās kai iz sovejū. Byut Latgolā, tik skaistā vītā, i runuotīs ar taidu cylvāku kai Gundaru — deļ ituo viņ beja vārts filmētīs “Piļsātā pi upis”.”

Sadarbeibu ar G. Āboliņu ar pateiceibu nūviertej ari filmys producents Guntis Trekteris: “Gundars ir cīš praseigs pret sovu i cytu dorbu. Kod jis īsarūn filmiešonys laukumā, vysi ir drupeit nūsabeiduši, bet dreiž viņ itū nūsaseitū saspryngumu klīdej apbreins par juo izcylū veikumu, kai ari cīš cylviecyskuo i syltuo attīksme i pret kolegom akterim, i puorejū grupu.”