Filmu “Piļsāta pi upis” uzjam ar stuovovacejom

Filmu “Piļsāta pi upis” uzjam ar stuovovacejom

Rokstu sagataveja: portals lakuga.lv

Latgolys pyrmizruodi 11. janvarī Kruoslovā pīdzeivuoja Vīstura Kairiša spieļfilma “Piļsāta pi upis”. Vysu pyrms filma izruodeita Latgolā, tai paruodūt pateiceibu par Latgolys nūvoda īdzeivuotuoju miļzeigū, entuziasma pylnū atbolstu filmys tapšonā. Pyrmizruodi Kruoslovā skateituoji uzjēme ar stuovovacejom. Reigys pyrmizruode filmai byus itūnedeļ – trešdīņ, 15. janvarī kinoteatrī “Splendid Palace”.

Iz filmys Latgolys pyrmizruodi beja īsaroduši gon filmys veiduotuoji, gon golvonūs lūmu akteri: Dāvis Suharevskis, Agnese Cīrule i Gundars Āboliņš. Sovys lūmys iz leluo ekrana Kruoslovā pyrmū reizi īraudzeja ari vītejī mozuoku i leluoku lūmu atveiduotuoji. Kūpumā masu skotūs filmā īsasaisteja gondreiž tyukstuša Latgolys vītejūs īdzeivuotuoju. Filmys akteru atlasis vadeituoja Māra Liniņa ar pateiceibu atguodoj, kai daudzi nu masu skotu dalinīku bejuši tik entuziasma pilni, ka pyrma fiļmiešonys naasūt nimoz uzdavuši parostūs vaicuojumus par tū, cik ilgi juosafiļmej, ci dūs ēst i kas par tū vyspuor byus.

Piec Kruoslovys pyrmizruodis vairuoki skateituoji dalejuos pyrmajūs īspaidūs par radzātū. Anna Rancāne nūviertej, ka filma ir lakoniska, ka režisoram izadevs izstuosteit Latgolys-Latvejis-pasauļa viesturis stuostu bez lelom puorspeilātom emocejom i patosa. Dzejneica atzeimoj, ka filmā latgalīšu volūda ir organiska. Māris Susējs, Bitis lūmys atveiduotuojs, piec filmys nūsavieršonys saceja, ka myusim juobyun pateiceigim par laiku, kurā dzeivojam. Volūdneica i kulturviesturneica Lidija Leikuma par režisora dorbu soka: “Jis ir malacs! Dabuot tik eisā sižetā vysu tū bleivumu, kab nabyutu nūmuocūšs īspaids, ir lela veiksme.”

Sovys sajiutys piec filmys nūdūšonys Latvejis skateituojim raksturuoja ari tuos režisors Vīsturs Kairišs: “Beja satraucūši i cīši emocionali filmu paruodeit Kruoslovā, i vyspuor palaist tū cylvākūs. Tū var saprast tikai tī, kas tū pīdzeivuojuši – izlaist nu seve vasalu sovys dzeivis pūsmu, sakoncentrātu napylnu divu stuņžu mirklī.”

Nu 17. janvara “Piļsāta pi upis” izruodeis kinoteatrūs. Seansus var meklēt pilsetapieupes.lv.